Shillong, Jylliew 02
Ka jingpynlong ïa ka Marathon da ka Ïatyllilang Group ha ryngkat ka phang, ‘Kyntiew Ïa La Ki Jong’, myn ha ka 23 tarik u Jymmang, 2026, ka la long kaba jop ha ka shnong Jongksha namar ka long kaba kyrpang na ka bynta ki khynnah, ki samla kumjuh wat ïa ki longkmie longkpa kiba dei na ki shnong kiba hap ha Mawkynrew Constituency.
Ïa kane ka Marathon la phiah ha la ki jong ki kyrdan kata ka Under-18 bad ka Above-18 jong ki shynrang bad kynthei.
Hashwa ban sdang kane ka marathon, na ka liang u Bah Banteidor Lyngdoh, MLA ka Mawkynrew u la kaweh lama kum u kongsan ha ka jingdonlang ki nongïalam shnong, ki nongkitkam jong katei ka group lem kiwei-kiwei pat.
U Bah Banteidor haba kren shi kyntien ar kyntien ha katei ka step u la ong ba kane ka long ka rynsan ban sei ïa ka sap ki khun samla ha kane ka jingïakob bad shi bynta ruh kum ka jingkilan met ban long kiba koit kiba khiah.
Ïa ka kyrdan ba nyngkong ha ka Above-18 ki shynrang la jop da u Banjoplang Rynjah, ïa ka kyrdan ba-ar la ïoh da u Bansharai Rynjah bad balai u Ridikorlang Mylliem. Kine baroh lai ngut ki dei na ka shnong Laitkyrhong.
Ha ka Under-18 Men, ïa ka kyrdan ba nyngkong la jop da u Pynkotlang Nongspung na Jongksha, ba-ar u Wanlamkupar Nongrum na Kharang bad ïa ka kyrdan balai la ïoh da u Debinson Nongrum na Thynroit.
Ha ka Women Category, ïa ka kyrdan ba nyngkong la jop da ka Ribha Nongrum na Laitmynsang, ba-ar ka Merryfully Marboh na Kharang bad ïa ka kyrdan balai la ïoh da ka Ibaphilisha Khongsngi na Laitkyrhong.
Ha katei ka step la sam ruh ïa ki khusnam kyrpang sha kiba khynnah tam napdeng ki khynnah kynthei bad shynrang kiba pyndep ïa ka jingïakob kata u Nangshanskhem Kharbuli ba dang 9 snem ka rta uba na Jongksha bad ka Riïaka Mylliem ba dang 12 snem ka rta na Laitkyrhong.
Kine ki khusnam ba la ïoh da kitei ki nongjop ki long da ki song pisa ba la sam da u kongsan bad ki riew rangbah kiba la ïadonlang.
