Shillong, Jylliew 02
Ki kmie ki kpa jong ki khynnah skul ka Shillong Public School ha ka sngi Ba-ar ki la leit ban ïakynduh ïa u Director ka Direc -torate of School Education & Literacy (DSEL) Megha laya ban ïakren halor ka jingbym ïoh ïalehkai shuh ki khynnah ha ka madan kaba ki ju ïalehkai na ka por sha ka por.
Kane ka jingbym ïoh shuh ki khynnah ban ïalehkai ha katei ka madan jong ka skul ka long hadien ba la dep ban siang thymmai da u phlang plastik bad la kynnoh ba ka la long pynban ka kam shna pisa da kaba aiwai sha kino kino ki kynhun kiba kwah ban ïalehkai ha katei ka madan.
Watla ka jingthmu ki kmie ki kpa ban ïakynduh ïa u Director, ka la long pynban kaba sepei namar kim shym la ïoh ban ïakynduh bad la bthah ïa ki ba kin wan ïakynduh ha ka 5 tarik mynta u bnai.
Haba ïakren bad ki nongthoh khubor, ki kmie ki kpa jong ki khynnah ki la pynpaw ka jingsngew bynñiaw namar ha kane ka madan mynshuwa ki khynnah skul ki ïoh ïalehkai bad ym ju don ka jingkhang ïa ki ban ïalehkai, hynrei jia ryngkhat naduh ba la maramot pynbha ïa ka, ki khynnah kim ïoh shuh ban ïalehkai.
Ki la ong ruh ba nyngkong hadien ba la ïohi ba la pynbha ïa ka madan, ki la pynpaw ka jingkmen ba kin ïoh ban ïalehkai ha ka madan kaba paka, hynrei ka long pynban da khongpong namar ki khun jong ki kim ïoh shuh ban ïalehkai bad ki hap ban ïalehkai ha phyllaw jong ka skul, ym shuh ha madan ïalehkai.
Nalor kata ki la kynnoh ba ka don ka jingthmu ban kamai pisa shimet jongno re jongno naduh ba la wan plie da u Myntri ka tnad ïalehkai, ha kaba ki la pan ruh ïa ka Memorandum of Under-standing (MoU) na u Director, ban tip ba mano ba donkti ha kane ka kam.
Na ka liang ki nongthoh khubor ki la lap da la ki jong ki khmat ba ki khynnah skul mar shu dep bamja, ki la shu hap ban lehkai ha phyllaw ym shuh ha madan kaba ki dei hok ban ïoh.
Na ka liang u Director ka DSEL u Bah B.J Kharshandi u la pynpaw ba kat kum ka MoU ym shym la don ka jing-khang lad ïa ki khynnah bad la ailad ban pyndonkam ïa ka madan naduh 7 baje mynstep haduh 3 baje nohphai sngi, hynrei ka la don tang ka jingpyrkhing ban rung sha madan ka dei namar ba ki khynnah ki ïabam ja sngi ha madan ïalehkai.
“Ïa katei ka madan yn pyndonkam da ki skul lada ki kwah ban pynlong ïa ki lympung ïalehkai phutbol bad ha kajuh ka por na ka bynta ki shlem ai jinghikai ban sei ïa ki khlur ïalehkai phutbol.”
