Guwahati, Jylliew:
Ki pulit ka Assam wat hadien ba ki la ïoh ban pyllait bad pynphai ïing biang ïa saw ngut ki khynnah kynthei kiba la jah, ki dang ïai bteng ban pynlong ïa ka jingtohkit ban lap ïa ka tynrai halor ka jingjah jong ki.
Ki pulit khlem shong-thait ha ka ban wad ïa ki saw ngut ki khynnah kynthei kiba la jah, na ka thaiñ Basistha jong ka Guwahati ki la ïoh ban pyllait im bad lap ïa ki haduh Howrah ha West Bengal hapoh 24 kynta hadien ba ki la jah rngai, la ïathuh ki heh sorkar ha ka sngi Ba-ar.
Kumba la ïathuh ka tyllong khubor, la ong ba kine ki hynnah kynthei, baroh ki dei ki khynnah skul jong ka Beltola Majhipara Middle English School bad ki nongshong shnong jong ka thaiñ Basistha-Beharbari, ki la leit skul ha ka step jong ka 1tarik Jylliew, hynrei kim shym la lah ban leit phai sha la ïing, kaba la wanrah ïa ka jingsngewkhia ïa kiba haïing hasem jong ki.
Kane ka jingjia ka la pynmih ïa ka jingsngew-khia ha ka thaiñ Basistha ha Guwahati hadien ba la ïathuh ba saw ngut ki khynnah skul ki la jah rngai hapoh ki jingjia ba phylla ha ka 1 tarik u Jylliew.
La ïathuh ba ki la mih na la ïing ban leit skul ha ka por 8 baje mynstep, kumba long ha ka sngi long skul.
Kine kiba la jah ki dei kiba la tip kyrteng kum ka Nirupai Ray, Ayushree Singh, Jilmil Daimary bad Rumi Baruah.
Hadien ki jingujor ba la ujor da ki kmie ki kpa, ki pulit ka Basistha ki la sdang ïa ka jingtohkit bad sdang ïa ka jingpyrshang ban wad ïa ki khynnah rit kiba la jah rngai.
Da kaba pyntreikam stet, ki pulit ki la lap bad ïoh pyllait im ïa kine ki khynnah kynthei ha Howrah bad pynthikna ïa ka jingpyllait ïa ki hapoh shisngi.
Kane ka jingpyntreikam ka la long kaba jop ha kaba ka la wanrah jingsuk ïa ki longïing, kiba la ap khmih lynti da ka jingsngewkhia ïa ka jingtip shaphang ka jaka ba kine ki khynnah ki don.
Kine ki khynnah kynthei mynta ki la don ha ka jingshngaiñ, bad ka jingtohkit halor kane ka jingjia ka dang ïai bteng khnang ban lap ïa ki daw halor ka jingthmu jong ki ban leit shabar ka jylla.
