Shillong, Jylliew 03
Ki rangïalehkai shakhmat ka Spain, u Lamine Yamal bad u Nico Williams, ki dei ban long kiba biang pura hashwa ïa ka por na ka bynta ban pynkhreh ïa ka jingïakhun nyngkong jong ka ha ka FIFA World Cup 2026, pyrshah ïa ka Cape Verde, ha Atlanta, ha ka 15 tarik mynta u bnai, la pynpaw u coach kane ka kynun u Luis de la Fuente, ha ka jingïalang bad ki nongthoh khubor ha ka sngi Balang.
Kine ki arngut ki rangïalehkai ki la duh ïalehkai na ka bynta ki klob jong ki ha kaba kut jong ka aïom ïalehkai na ka daw ki jingmynsaw, hynrei u De la Fuente u la jied ïa ki na ka bynta ka kynhun ïalehkai ba khatduh ban pynkhreh ïa ka World Cup bad la khmih lynti ba baroh arngut kin ïoh biang ïa ka jingkoit jingkhiah kaba pura khnang ba ki lah ban shim bynta ha kane ka lympung.
“Ngi la ïatreilang bad ki klob, ngi la ailad ïa ki ba kin bteng ha ka prokram kaba ngi la pynkhreh kumba katto katne por, bad ka jingshisha ka long ba ki nongïalehkai ki la nangkiew manla ka sngi,” la ong u De la Fuente shwa ka jingïalehkai paralok pyrshah ïa ka Iraq ha ka sngi Palei.
Katba u coach u la pynpaw ba kine ki arngut kiba la mynsaw ki la nangkiew kumba ngi khmih lynti, kine ki arngut kim lah ban don bynta bad ka kynhun na ka bynta ka jingïalehkai paralok pyrshah ïa ka Iraq ha A Coruña.
Ha kaba ïadei bad u rangïalehkai ba dangkhynnah ka Barcelona u Yamal, u De la Fuente u la ong, “Lada kiei kiei baroh kin ïai bteng kumba ki long haduh mynta, u lah ban long uba la khreh ban ïalehkai ha ka 15 tarik, hynrei ym pat lah ban pynthikna ba un ïalehkai.”
Kumba ka paw ka Spain ka long kawei na ki ri ba paw ha kane ka lympung kaba don 48 tylli ki kynhun, ka ban long ha kylleng jong ka Canada, Mexico bad America. Hynrei u De la Fuente u la kyntait ba kane ka lympung kan long kaba itynnad namar ba ka dei ka World Cup ha kaba bun ki kynhun ki don la ka jong ka jingkyrmen ban jop.
Hadien ka jingïakhun ïa ka Cape Verde, ka Spain kan pynkhreh ban ïalehkai pyrshah ïa ka Saudi Arabia ha ka 21 tarik mynta u bnai ha Atlanta hashwa ba kan pynkut ïa ki jingïalehkai group pyrshah ïa ka Uruguay ha Guadalajara ha ka 27 tarik.
Ki kyrteng ki rangïalehkai ka Spain na ka bynta ka World Cup
Goalkeeper: Unai Simón (Athletic Bilbao), David Raya (Arsenal), Joan García (Barcelona)
Defender: Pedro Porro (Totten-ham), Marcos Llorente (Atleti), Aymeric Laporte (Athletic), Pau Cubarsí (Barça), Marc Pubill (Atleti), Eric García (Barça), Marc Cucurella (Chelsea), Alejandro Grimaldo (Leverkusen)
Midfielder: Rodri (Man City), Martín Zubimendi (Arsenal), Pedri (Barça), Fabián Ruiz (PSG), Mikel Merino (Arsenal), Gavi (Barça), Álex Baena (Atleti).
Forward: Mikel Oyarzabal (Real Sociedad), Lamine Yamal (Barça), Ferran Torres (Barça), Borja Iglesias (Celta), Dani Olmo (Barça), Víctor Muñoz (Osasuna), Nico Williams (Athletic), Yéremy Pino (Crystal Palace)
