Shillong, Jylliew 03
Ka Meghalaya Football Association (MFA ka la pynbna ban die ïa ki tiket na ka bynta ka jingïalehkai final jong ka lympung ïalehkai 5th Meghalaya State League ka ban long mynta ka sngi Palei ha jaka die tiket jong ka SSA Stadium kaba ha Polo.
Kane ka jingïakhun final hapdeng ka lahduh jong ka SSA Champions Cup 2025 ka Nongkseh SSCC pyrshah ïa ka Langsning FC, la khmih lynti ba kan long kaba itynnad na ka bynta ban ïaknieh ïa ka nam lahduh. Da kaba khur jingjop ha kane ka lympung kan plie lad ban ïoh ïashim bynta ha ka I-League 3 jong ka All India Football Federation.
Ïa ki tiket ha kane ka sngi Palei yn die naduh ka por 2 baje nohphai sngi haduh 6 baje janmiet, katba ha ka sngi Thohdieng yn die naduh ka por 1 baje mynsngi. Katei ka jingïakhun final kan long ha ka por 6 baje janmiet lyngba ki jingshai jong ki ‘floodlight’.
Ki dor jong ki tiket kin long naduh T. 100 haduh T. 300, ha kaba lyngba ka jingailad ha ka dor kaba bit kan long ka jingplie lad ïa ki paidbah riew ïeit phutbol ba kin pyndap ïa katei ka stadium.
Ïa kane ka lympung ba la pynïaid da ka MFA, la kyrshan pisa da ka tnat ïalehkai jong ka Sorkar Jylla. Hadien ba la lah ban pynlong haduh 130 tylli ki jingïalehkai ïa ka MSL 5 kaba la sdang naduh u Ïaïong, ka Nongkseh bad ka Langsning kin pynkhreh ban ïaknieh ïa ka nam lahduh.
