Itanagar, Jylliew:
Ka jingthep kyrteng na ka bynta ka elekshon Rajya Sabha ban wan na Arunachal Pradesh ka la sdang naduh ka 1tarik, Jylliew, hadien ba la pynmih ïa ka jingpynbna jong ka Election Commission, la ïathuh ki heh sorkar.
Katkum ka por elekshon, la buh ïa ka 8 tarik, Jylliew, kum ka tarik ba khatduh ban thep kyrteng, katba ka jingpeit bniah ïa ki kot thep kyrteng kan long ha ka 9 tarik Jylliew, ki kyrtong ki lah ban weng kyrteng haduh ka 11 tarik, Jylliew. Ka jingthep vote, lada donkam, kan long ha ka 18 tarik, Jylliew bad ka jingñiew ïa ki vote kan long ha kajuh ka sngi. Ka samoi treikam jong u dkhot ba dang shong jong ka Rajya Sabha, u Nabam Rebia, la buh ba kan kut ha ka 23tarik, Jylliew.
Ka Election Commission ka la pynbna ïa ka elekshon sha ki 27 tylli ki jaka Rajya Sabbha ha kylleng ka ri, kynthup ïa ki 24 tylli ki jaka ba lait shisien ar snem ha ki 10 tylli ki jylla.
Ha Arunachal Pradesh, la ïathuh ba ki don baroh 14 ngut ki nongïakhun, kiba la aplai ïa ka kyrteng jong ka BJP kaba synshar, na ka bynta ka shuki ba marwei jong ka Rajya Sabbha. Napdeng kiba don ha katei ka jingïakhun ki long u Myntri ba dei khmih ïa ka mariang bad ki khlaw ka jylla u Wangki Lowang, u MP ba mynta u Nabam Rebia, u MLA ka Pasighat West u Ninong Ering, ki myntri barim ka jylla u Taba Tedir bad u Tage Taki, ryngkat u president barim ka BJP ka jylla u Tai Tagak bad u Tangor Tapak.
Ki tyllong khubor na ka BJP ki la pynpaw ba ka seng kam pat lah ban pynbeit ïa u nongmihkhmat jong ka bad la khmih lynti ba ka Parliamentary Board jong ka kan sa ïakynduh shen ban shim ïa ka rai.
Da kaba ka BJP ka ïoh ïa ka jingbun paid ha ka ïingdorbar thawaiñ jong ka Arunachal Pradesh kaba don 60 ngut ki dkhot, la khmih lynti ba u nongmihkhmat jong katei ka seng un ïoh ïa ka jingjop ha ka elekshon na ka bynta ka shuki marwei jong ka Rajya Sabha.
Kane ka jingïakhun ka la pynmih ïa ka jingsngewtynnad kaba khraw hapoh ki kynhun saiñ pyrthei, ha kaba katto katne ngut ki nongïalam ba rangbah ki la ïakhun ban ïoh ïa ka kyrdan ba pawnam ha ka dorbar thawaiñ.
