Shillong, Jylliew 03
Ka jingthep hi da u rangïalehkai Laitlulong SC tang mar ïasdang ka jingïalehkai ka la pynïoh mynsiem ïa ka Mawpdang SC kat haduh ba ka la jop da 7-1 kol ïa ka liang pyrshah ha ka lympung ïalehkai SSA U-20 4th Division Football League 2026 kaba la long ha ka sngi Balang.
Tang mar ïasdang ka jingïalehkai ha kane ka jingïakhun kaba la long ha SSA Stadium kaba ha Polo, ka Mawpdang ka la ïoh ei shi kol lyngba ka jingïarap pynthep da u Shembhabok Thabah ha ka minit kaba 2. Kane ka shi kol ka la pynïoh mynsiem ïa kane ka kynhun ha kaba ka la pynbud biang sa saw kol hashwa ban kut ka kylla step lyngba u Marbiang Kharbhih (9), Samborlang Langte (14), Jonathan Kharbani (15) bad u Chesterfield Umsong (40+2)
Hadien katto katne por ka Laitlulong ka la pynphai kylla shi kol lyngba u Freadynial Warjri- ha ka minit kaba 70. Ka Mawpdang ka la ïoh ban thep biang sa ar kol lyngba u Eamonlang Rymbai (74) bad u Rafealnando Langstieh (80+3) na ka bynta ban khur syndon ïa ka jingjop.
Ha ka jingïakhun kaba la long kham hashwa, ka Thynroit SC ka la pynliem noh ïa ka Don Bosco Academy da 10 kol bad ïa kane la thep da u Ishanborlang Kurkalang ha ka minit kaba 46.
Haba phai sha kawei pat ka jingïalehkai kaba la long ha madan MFA ha Polo, ka Weilyngkut Area FCC ka la jop da 3-0 kol ïa ka Nongthymmai S&CC. Kane ka la wan urlong lyngba ki kol ba la thep da u Kaliwan Roin ha ka minit kaba 10, kumjuh u Sengrak Jana (46) bad u Robert Nongsiej (70).
Ka jingïalehkai ha ka sngi Palei kan long ha ka por 1 baje mynsngi hapdeng ka Golflink SC pyrshah ïa ka Mawlyngngad SC, katba ha ka por 4 baje nohphai sngi kan long hapdeng ka Pynthorbah SC ïa ka Nongkseh United FC. Ïa kine baroh ar ki jingïalehkai yn pynlong ha SSA Stadium. Katba ka Mawphlang SC ïa ka New Challenger FC ha ka por 4 baje nohphai sngi ha madan MFA, Polo.
