Shillong, Jylliew 04:
Ka kynhun ïalehkai Kickboxing ka Jylla hapoh ka lama jong ka Meghalaya State Kickboxing Association (MSKA) ka la wanrah burom da kaba khur 9 tylli ki takma ha ka lympung ïalehkai Junior Boy’s and Girl’s National Kickboxing Championship kaba la kut dangshen ha Khurda, Odisha. Kine ki kynthup ïa 3 tylli ki takma ksiar, 3 ki rupa bad 3 ki rnong. Ïa kane ka kynhun la ïalam da ka Daniella IW Mylliemngap kum ka coach bad kaba long ruh nongïalehkai kaba la khur ïa ka takma rnong ha ka Asian Kickboxing Championship ha u snem 2024. Ïa katei ka lympung la sdang naduh 30 tarik u Jymmang bad ka la poi sha kaba kut ha ka 3 tarik mynta u bnai ha kaba la wan shim bynta da ki kynhun na ki jylla bapher-bapher jong ka ri. Ha kane ka lympung u Derick Dashankur Nongrum u la bteng ban bat ïa ka nam lahduh haduh lai snem kynthih ha ka K1 Rules below 54 kgs bad u dei uba dangshong Class XII ha St. John Bosco HSS. Une u khynnah uba na Laitryngew Dongsurok u la lah ban pynliem noh ïa u rangïalehkai na Goa ha ka jingïakhun final na ka bynta ban khur ïa ka takma ksiar. Katba u Aedriel Gordon Ranee uba dangshong Class X bad uba dei u nongshong shnong na Maraikaphon Sohra u la khur ïa ka takma rnong ar sien kynthih ha ka K1 Rules below 48 kgs, hadien ba u la shah rem noh ha u rangïalehkai na Manipur ha ka semi final bout. Ka Nathania Mylliem Umlong ka la khur ïa ka rupa ha ka sien kaba nyngkong eh ha kane ka lympung ïalehkai shabar jylla ha ka Low Kick below 48 kg. Kane ka khynnah kaba dangshong Class VIII ha Government UP School Mawlai Nongkwar ha ka jingïakhun final. Katba u Aldrin Osmond Pariat uba dangshong Class X ha May Queen Secondary School Mawlai Nongpdeng u la khur ïa ka takma ksiar ha ka K1 Rules below 60 kg hadien ba u la lah ban pynlong ïa u nongïalehkai na Himachal Pradesh. Ïa kawei ka takma ksiar la khur da u Darren Ervin Blah ha ka 51 kg hadien ba u la jop ïa u nongïalehkai na Odisha. Kiwei pat kiba la khur ïa ki takma rupa ki long u Misariio Nongdhar kaba na Demthring ha ka Full Contact below 45 lem bad u Sumarlang Kharumnuid na Lad Nongkrem ha ka K1 Rules below 57 kg, hadien ba ki la shah rem ha ka jingïakhun final ha ki nongïalehkai na Kerala bad Tamil Nadu. U Merapkerlang Lyngwa (Full Contact below 63 kg) na Jaïaw St Joseph Shillong lem bad u Hamebuhnam Pathaw (Full Contact below 45 kg) na Mawlai Umjaïur ki la shah rem noh ha ka semi final bout ha ki nongïalehkai na Maharashtra bad Jharkhand. Kaba kham sngew tynnad ka long ba lyngba ka jinglah ban khur takma ha katei ka lympung kaba la long ha Odisha, ka Jylla ka la lah ban kynjoh sha ki 321 tylli ki takma naduh ba la khur nyngkong ha u Nailar jong u snem 2017. Kine ki kynthup ïa 104 tylli ki takma ksiar, 102 ki rupa lem bad 115 ki takma rnong lem bad 67 tylli ki takma ha ki lympung ïalehkai bar ri bad 9 tylli na ka bynta ka NEHU ha ka All India Inter University Games naduh u snem 2019
