Shillong, Jylliew 04:
U rangheh ksah ka Jylla u Bapyntngen Marvin Synnah u la khur haduh lai tylli ki takma ksiar na ka rynsan pyni dohksah jong ka ICN (I Compete Natural) National Bodybuilding Championship, kaba la long ha Bengaluru ha ka 30 bad 31 tarik u Jymmang. Une u khlur ïalehkai u la khur ïa kitei ki takma ha ka Classic Physique bad Men’s Fitness Model. Halor kane ka jingjop, u Bapyntngen ula pynpaw da kaba ong kane ka jingjop kan yn wan khlem ka jingbtin lynti bad jingkyrshan u Coach u Bah Bransley Nongkynrih, uba la ai jinghikai ha Iron House Gym, Nongmensong. Ïa ka ICN (I Compete Natural) la ithuh kum ka Natural Bodybuilding Federation ba la ithuh ha pyrthei, kaba kyntiew ïa ka jingïakop ba lait na ki jingdih pynkhlaiñ bor kum u drok bad ban leh hok lyngba ka jingtrei shitom.
