Guwahati, Jylliew:
U Myntri Rangbah ka Assam u Himanta Biswa Sarma ha ka 3 tarik, Jylliew, u la ai ka jingïaroh ïa ka jingkhynra pyrshah drok kaba heh kaba la pynlong da ki pulit ha Karbi Anglong, ha kaba la ïoh kurup 13.482 kilo u drok opium uba shongdor haduh T.1 klur bad san ngut ki briew ki la shahkem. Haba ïasam ïa ki jingtip ba bniah halor kane ka jingkhynra ha ka rynsan X, u Myntri Rangbah u la ong ba ka Assam ka dang ïai neh ha ka jingpynkhreh ïa ka jingkhaïi drok. “U drok um don lad ban ïaid lyngba ka Assam. Ha ka jingkhynra kaba jop, ki pulit ka Karbi Anglong ki la ïoh ban kurup 13.482 kg u drok ba shongdor haduh 1 klur tyngka ha khyrdop Dillai bad kem ïa san ngut ki briew”, la ong u Sarma. Ïa kane ka jingkhynra la pynlong da ki pulit ka Karbi Anglong ha Dillai Gate kum shi bynta ban ïakhun pyrshah ïa ka jingkhaïi drok beaiñ jong ka jylla kaba dang ïaid shakhmat. Haba ai khublei ïa ka kynhun pulit, u Myntri Rangbah u la ïaroh ïa ka jingtrei shitom jong ki pulit Assam ban tehlakam ïa ka jingïaid ki drok lyngba ka Jylla.Ki pulit ki la kem ïa san ngut kiba la shah kynnoh, bad ka jingtohkit ka dang ïaid ban lap ïa ka tynrai bad ka jaka ba la thmu ban leit ïa u drok ba la kurup.
