Shillong, Jylliew 04:
Ka jinglong jingman hapoh ka Meghalaya Cricket Association MCA) bad kumjuh ha ka jingïalehkai kriket ka la don hapdeng ka umdum namar ki kynrum kynram kiba la mih halor ka jingshah jrong kti bad shah kren kynshleiñ ki ‘thei ïalehkai U-23. Haba ïakren bad ki nongthoh khubor ha ka sngi Palei, u President ka MCA u James PK Sangma u la pynpaw ba ka jinglong jingman hapoh ka synjuk bad ki nongïalehkai ka don hapdeng ka umdum, hynrei u la khmih lynti ba kan sa long kaba khuid ba suba ha ka rukom treikam jong ka. Shuh shuh u James u sngew ba ynda haba ka um slap ka la rah bad rong lut ïa ka jaboh jabaiñ hangta kein yn sa lah ban shem bad ïohi ïa ka jingsdang ban khie im bad ban kyntiew biang ïa ka jingïalehkai kriket hangne hapoh ka Jylla. Kumba ka long mynta ka rukom treikam jong katei ka synjuk ka la don hapdeng ka jingdkoh bad ka la mih shibun ki kynrum kynram hadien ba la pynthymmai ïa ki dkhot nongkitkam bad ka la mih ka jingïapher jingmut hapdeng ki para dkhot. Haba ïadei bad ka jingbym ïahap jingmut bad u Secretary u Bah Raynold Kharkamni, u James u ñiew bad shim ba kum kine ki jingjia, ki lam sha ka jingpynkhlaiñ ïa ka rukom treikam ha manla ki kynhun ne ki synjuk ialehkai
