Shillong, Jylliew 04:
U nongap wicket bad nongtied jong ka ri India u KS Bharat, u la pynbna ba un shongthait noh na ki jingïalehkai shabar ri bad kane ka long ka jingkut noh ka kam ïalehkai jong u hadien ba u la ïoh ban ïalehkai hynñiew sien ha ka Test na ka bynta ka kynhun ïalehkai jong ka ri. Une u rangïalehkai kriket ka Andhra Pradesh u la ïalehkai nyngkong ïa ka Test ha u snem 2023 pyrshah ïa ka Australia ha Nagpur bad ïakhun ïa ka jingïalehkai (red-ball) kaba khatduh pyrshah ïa ka England ha Visakhapatnam. Ha baroh ki 12 tylli ki jingïalehkai, u la kamai 221 ron ha ka average kaba 20.09. Ha ka khubor kaba sngewrit, u Bharat u la ong ba ka jingmihkhmat ïa ka India ka long kum ka burom kaba khraw tam ha ka jingim jong u bad u la pynpaw ïa ka jingaiti lut, bad ka rukom kyrshan kaba khlaiñ kaba la ïarap ïa u ban poi sha ka kyrdan ïalehkai ha pyrthei. “Da ka dohnud kaba sngew sarong bad ka jingsngewnguh, nga pynbna ba ngan shongthait noh na ka jingïalehkai kriket shabar ri,” la pynpaw u Bharat. “Ban ïalehkai na ka bynta ka ri jong nga ka la long ka burom kaba khraw tam ha ka jingim jong nga. Kane ka jingïaid lynti jong nga ka la wanrah ïa ka jingsngew sarong bad ka jingkhlaiñ, hynrei ka long ka burom ban mihkhmat ïa ka India ha ki jingïalehkai Test.” Utei u rangïalehkai ba la 31 snem ka rta u la pynpaw shuh shuh ïa ka jingsngewnguh kaba khraw ïa la ka longing longsem, da kaba pdiang ïa ka jingkyrshan jong ki kmie ki kpa bad ka para jong u ha ka jingïalehkai kriket kaba la neh palat 20 snem. U la ai khublei ruh ïa ka BCCI, ka Andhra Cricket Association, ki coach, ki nongpynïaid ïa ka kynhun, ki paralok bad ki nongtrei ha madan kiba la don bynta ha ka ban kyntiew ïa u kum u nongïalehkai. U Bharat u la ai burom kyrpang ruh ïa ki katto katne ki riew pawkhmat ha ka jingim jong u, kynthup ïa u Virat Kohli, uba la plie lad ïa u ban ïoh ïalehkai nyngkong ha ka IPL bad u Rohit Sharma, ha kaba hapoh jong u, u la ïoh ban ïalehkai ha ka sien kaba nyngkong ha ka Test. “Ka jingïaid lynti jong nga bad ka BCCI bad ha ka Test ka lah ban poi sha kaba kut, hynrei ka jingïaid lynti jong nga ha ka jingïalehkai ka dangïai bteng,” u la bynrap.
