Guwahati, Jylliew:
Kumba la khmih bniah, la ong ba lajan man la ka khyndiat sngi, ka Assam ka ïoh ban kurup bad pynpulom ïa ka jingthmu shalan drok kaba kot da T. 2 klur, T. 7 klur, T. 20 klur ne wat T. 45 klur. Lada shim marwei marwei, ki paw kum ki jingnang kiew na kawei ka por sha kawei pat. Ka jingtip ba la lum thymmai na ki jingbuh jingkheiñ jong ka Narcotic Drugs and Psychotropic Substances (NDPS), ka pyni ba hapdeng u snem 2020 bad 2024, ka Assam ka la pynrung 12,500 tylli ki case NDPS bad 20,398 ngut kiba la shah kem, kaba bun tam napdeng ki 12 tylli ki jylla jong ka thaiñ Mihngi bad ki jyla ba shaphang Shatei-lamMihngi. Kumba ka paw na ki khubor bad ki jingjia ba la jia, la sakhi ba kiba bun kiba ju shalan drok sha kylleng ki jylla ki dei ki nong Assam ha kaba ïa kane la sakhi na ka jingjia kaba dang shen kaba la jia ha Mizoram ha kaba ki pulit ki la ïoh ban kurup ïa u drok Morphine bad Heroin kaba shongdor palat ïa ka 6 klur tyngka bad ki la kem ruh ïa lai ngut ki briew na Assam ha Saitual distrik. Katkum ka jingkheiñ ba thikna ba la pyllait da u Myntri Rangbah ka jylla u Himanta Biswa Sarma, ka jylla ka la buh jingthoh ïa ka jingïoh kurup drok kaba shongdor haduh T.2,919 klur ha kine ki san snem ba la dep. Ryngkat, kine ki jingkheiñ ki pynpaw ïa ka jingjur jong ka thma pyrshah ïa u drok kaba la pynlong ïa ka Assam ba kan sngap jar ban long kawei na ki pud ba kongsan jong ka India ban ïaleh pyrshah ïa u drok. Haba peit ha ka rukom kaba kham jylliew, kumba ka paw la ong ba ka jingpyrkhing ka la nang jur. Kumba la batai bniah, la ong ba ka jingïakhun pyrshah drok ka la nang jur bad khlaiñ ha Assam. Ha kaba ïadei bad kane, u Sarma u la ong ba ka jingïakhun pyrshah ïa u drok ha Assam kan ïai bteng bad ka jingpynkyrkhing ïa ki kyndon pyrshah ïa ki nongkhaïi drok kan sa nang bteng bad kumjuh ruh kane kajuh kan long ruh na ka bynta ki kynhun khaïi drok ba bun. “Ka thma pyrshah ïa u drok ha Assam ka la long kaba tyngeh haduh mynta naduh u snem 2021-2026. Ka jingpynshitom kaba tyngeh kan dang bteng ha ki sngi ban wan,” la pynshisha u Myntri Rangbah ka jylla haba u la pynpaw ïa ka jingpynkhlaiñ jong ka sorkar ban ïakhun pyrshah ia u drok.
