Shillong, Jylliew 05
Ka kynhun ïalehkai kriket ka India ka la mad ïa ka jingeh ha ki jingjia jingïakynduh ha ka jingpynkhreh ïa lai tylli ki jingïalehkai ODI series pyrshah ïa ka Afghanistan, ha kaba u rangïalehkai ba kynsai ka Ri u Virat Kohli um lah ban shim bynta ha kane ka jingïalehkai hadien ka jingmynsaw ha ki dohksah ka kjat jong u.
Kane ka jingmynsaw ka la ktah shibun ïa u Kohli ha kaba u la duh lypa ban don bynta ha ki T20Is bad ki jingïalehkai Test uba mynta u la pynleit jingmut noh tang ha ki 50-over format bad thmu ban pyndep ïa ka kam ïalehkai jong u da kaba shim bynta ha ka 2027 ODI World Cup.
Ka jingmynsaw jong u Kohli kaba la jia ha ka Sngi U Blei 31 tarik Jymmang ha ka jingïalehkai final jong ka IPL 2026. Ha kaba u la pynlah ïa ka Royal Challengers Bengaluru’s (RCB) ban jop arsien ha kane ka lympung IPL khlem da shah rem.
Ka kynhun ka India ka la shem jingeh ruh wat ban jied ïa ki Coach kiba heh ha kaba u Rohit bad u Hardik ruh kim pat tikna. Ha kaba ïa ka kynhun mynta la ïalam noh da u Shubman Gill.
Kine ki lai tylli ki jingïalehkai ha la ïing pyrshah ïa ka Afghanistan kan sdang naduh 13 tarik Jylliew ha Dharamshala, ka ban sa long sa sha New Chandigarh, Lucknow, bad Chennai. Ka kynhun ba dei peit ïa ka India ki la khmih lynti ba u Kohli u koit noh kloi ba u lah ban wanphai sa ha ka kam lehkai ha ka por kaba biang ha kaba ka India kan ïakhun ïa ka England naduh 14 tarik Naitung.
