Shillong, Jylliew 05
Ka Nongkseh SSCC ka la pynkut ïa ka jingïakhun ba nyngkong eh jong ka ha ka Meghalaya State League da ka jingjop ha ka phainal pyrshah ïa ka Langsning FC ha ka jingïalehkai final jong ka MSL 5 ha madan SSA mynta ka miet ka 05 tarik Jylliew 2026.
Ka Nongkseh ka la pyni ïa ka jingïalehkai kaba bha tam ha ka samoi ïalehkai baroh kawei ha kaba kala pynliem noh ïa ka Langsning da 2-1 kol. Kum ka nongjop ka Nongkseh ka la ïoh ïa ka trophy kaba itynnad bha bad ka cheque kaba T.8 lak na u Myntri Rangbah ka Jylla u Conrad K Sangma, ïa uba la synran lang da u Symbud Myntri Rangbah u Bah Prestone Tynsong, u Myntri ka tnad ïalehkai u Bah Wailadmiki Shylla bad bun kiwei pat ki riew pawkhmat. Ka Langsning kaba wan ba-ar ka la ïoh khur ïa ka pisa kaba T.5 lak – kane ka dei ka pla khusnam kaba heh tam ha ka histori jong ka MSL.
Ka Nongkseh kaba la kum thep sha ka kol lajong (45’+1) tang shwa ban kut ka kylla step hynrei ka la wan phai biang ha ka kylla miet lyngba u captain Hardy Cliff Nongbri (61′) bad u Shano Tariang (68′). Ka la long ka jingpynkut kaba khraw ïa ka sien kaba phra jong ka MSL, kaba dei ka jingthmu jong ka Meghalaya Football Association ryngkat ka jingkyrshan ba pura jong ka tnad Directorate of Sports and Youth Affairs.
Ki nongkyrshan ha kane ka lympung MSL ki long kiba shongshit bha naduh ba sdang kane ka lympung hynrei ha kane ka sngi ki la kham shongshit shibun ha kaba baroh ki la ïadon lang, da kaba la die lut ki tiket naduh ka por mynsngi, kaba pynshisha ïa ka jingieit jong ki nongkyrshan ïa ka phutbol ha ka thaiñ.
Kane ka samoi jong ka MSL kaba mynta ka la kham long ka jingïakhun ba shongshit shisha, namar ki kynhun kiba ïashim bynta ki kham bun ban ïa kaba mynshuwa kata 33 tylli ki kynhun, ki jaka ïalehkai ki kham bun 8 tylli ki jaka ne ki madan bad ki jingïalehkai ki kham bun kata 139 tylli. Mynta u snem kane ka league ka la pyndep ïa baroh ki jingdonkam jong ka All India Football Federation, ha kaba la pyntreikam ïa ka Competition Management System bad ka Centralized Registration System ryngkat bad ka jingbun ki jingïalehkai ba donkam na ka bynta ki nongjop ban ïashim bynta ha ka I-League 3.
Ki kynhun kiba ïashim bynta bad ki komiti pynïaid jong ka thaiñ ki long kiba tbit ha ka jingpynïaid jong ki ha baroh kawei, kaba la lah ban pynlong ïa kane ka lympung, kaba don ka jingmut kaba kham khraw namar ba ka la long ha ka por ba rakhe ïa ka Jubili Ksiar jong ka MFA, kum ka jingjop kaba khraw.
Ka Langsning ka la ïakhun tyngeh katba lah ban ïoh thep kol biang hynrei kam shym la lah pynurlong shuh ha kane ka jingïakhun. Ka burom kaba khraw ka hap ban leit sha ki nongkyrshan jong baroh arliang mamla, ha kaba khatduh kan wanrah ïa ka MSL kaba don burom sha ka jingkut kaba jop.
La sam ruh ïa ki khusnam shimet ha ka jingïalang pynkut, ha kaba u nongïalehkai ka Nongkseh u Kitboklang Pale u la ïoh ïa ka nam kum u Player of the Final, u Guidle Syiemlieh jong ka Nongkseh kum u Best Goalkeeper, u Nelson Rymbai jong ka Langsning kum u Top Scorer (23 kol) bad u Hardy Cliff Nongbri kum u Player of the Tournament.
Ym lah ban artatien ba ka phutbol ka im bad ka dang ïaid beit ha Meghalaya, lyngba ka jingbteng ban bei tyngka jong ka Sorkar Jylla, ki bynta jong ka MFA, ki seng District bad baroh kiwei pat ki nongïashim bynta kiba don ka lad ban rah ïa ka phutbol Meghalaya sha ki kyrdan kiba kham heh bad kham shalor.
