Imphal, Jylliew:
Ki la don arngut ki nongleit jingleit kiba thmu ban leit sha Kolkata ki la shahkem ha ka kad liengsuiñ ha Imphal hadien ba ki bor pahara ki la ïoh kurup 4.09 kg u drok heroin na ki tiar jong ki ha ka por ba ki leh ïa ka jingpeit bniah, la ïathuh ki heh shipai.
Khlem da pynslem ban leh ïa ka kam hadien ba la ïoh jingtip, ki shipai jong ka tnat Central Industrial Security Force (CISF) ki la bat ïa kitei ki arngut ha ka por ba ki talasi ha ka kad liengsuiñ bad ki la kurup ïa katei ka mar ba la khang pyrshah, kaba la suba ba dei u drok heroin.
Kitei ki briew kiba la shah kem ki dei kiba la tip kyrteng kum u Syed Sabir Ali (26) bad u Khutheibam Sabir Ahmed (24), baroh arngut ki dei ki nongshong shnong jong ka Kiyamgei Oinam Loukon ha Imphal East district.
Katkum ka jingïathuh jong ki pulit, la ong ba kine ki arngut ki briew ki la shah khmih bniah ha ka por ba la peit bniah ïa ki jingrah jingrong jong ki naba ki la thmu ban kiew ha ka liengsuiñ ban leit sah Kolkata.
U drok heroin ba la kurup la antad ba u shongdor kumba T. 4.8 klur tyngka ha ka iew beaiñ jong ka pyrthei, la ïathuh ki pulit. Hadien ka jingïoh kurup, la aiti noh ïa kiba shah kynnoh sha ki bor ba dei peit ban tohkit bad pynngat ha ka aiñ. Ha kaba ïadei bad kane ka jingjia, ka la don ka jingujor ejahar hapoh ka Narcotic Drugs and Psychotropic Substances (NDPS) Act.
Ki nongtohkit ki dang pyrshang ruh ban wad ïa ka tynrai jong ka jingwan u drok bad ban ithuh ïa kiwei pat kiba don jingïadei bad katei ka kynhun, la ïathuh shuh shuh ki pulit.
