Shillong, Jylliew 07
Ka lympung ïalehkai bah eh duh ha ka pyrthei ka FIFA World Cup 2026 kan sdang ha ka 12 tarik mynta u bnai ha kylleng ki ri jong ka America, Mexico bad Canada.
Kane ka lympung ka long kum ka jingplie lad ïa ki rangïalehkai ba kin pyni ïa la ki jong ki sap ïalehkai jong ki ha ka pyrthei bad la khmih lynti ba kane ka jingïalehkai kan long ka jingplie lad na ka bynta ki rangïalehkai kiba dangkhynnah ba kin mih madan bad ban ïoh ïalehkai na ka bynta ki ri jong ki.
Uwei na ki rangïalehkai ba dang-khynnah uba la shah jied na ka bynta kane ka lympung u dei u Gilberto Mora na Mexico uba dang 17 snem ka rta. Une u rangïalehkai shapdeng u la mihkhmat ïa ka kynhun ïalehkai Liga MX ka Tijuana bad u la ïoh teng ban mihkhmat ha ki lympung ïalehkai bar ri. Ha u 2025, u Mora u la long u rangïalehkai ba dangkhynnah na ka bynta ban mihkhmat ha ka sien kaba nyngkong eh na ka bynta ka Mexico ha ka CONCACAF Gold Cup.
Kaba phylla ka long ba ïa u Mora ym pat shym la kha ha ka por ba u nongapkol ba la rim bha u Guillermo Ochoa, u paralok ba ïalehkai ka ri jong u, u la mih madan ha ka sien kaba nyngkong ha ka World Cup. Mynta u Ochoa u dangpynkhreh ban mih madan biang ha ka sien kaba hynriew ïa ka ri jong u ha kane ka lympung.
Kiwei pat ki rangïalehkai kiba dangkhynnah ha kane ka lympung ki dei u rangïalehkai shapdeng ka Czech Republic u Hugo Sochurek (ba dang 18 snem, 4 sngi), nangta u Lennart Karl ka Germany (18 snem, 109 sngi), u rangïalehkai shakhmat Senegal u Ibrahim Mbaye (18 snem, 138 sngi) bad u rangïalehkai shakhmat ka Egypt u Hamza Abdelkarim (18 snem, 161 sngi).
Ka rekod jong u rangïalehkai ba khynnah tam ban ïalehkai ha ka World Cup ka dei u Norman Whiteside na Northern Ireland, uba dang 17 snem bad 41 sngi ka rta ha ka por ba u ïalehkai ha katei ka lympung ïalehkai ha u snem 1982.
