Nongpoh, Jylliew 07
Ka tnad Social Welfare jong ka Ri Bhoi District ha ka sngi Saitjaiñ ka la pdiang burom ïa ki ‘thei ïalehkai ka district kiba khur takma ha ka jingwan ïashim bynta ha ka 4th PAFI National Arm Wrestling Championship 2026 ha Gujarat kaba la sdang naduh ka 29 tarik u Jymmang bad kut noh ha ka 2 tarik mynta u bnai.
Kine ki ‘thei ïalehkai kiba la shah pdiang burom hapoh ka jingïalam ka Kong Margaret Pathaw, ki dei kiba la ïoh jinghikai kyrpang lyngba ka Beti Bachao Beti Padhao ka tnad Social Welfare.
Kum ban shu kdew hangne, ki don haduh 104 ngut ki ‘rang bad ki ‘thei ïalehkai Arm Wrestling kiba la leit ban mihkhmat ïa ka Jylla sha katei ka lympung ba kynthup lang ruh ïa kumba 21 ngut kiba na Ri Bhoi District. Ha kane ka lympung, ka Jylla ka la khur haduh 81 tylli ki takma ba kynthup ïa 32 ki takma ksiar, 32 tylli ki rupa bad 33 tylli ki takma rnong.
Ki ‘thei ïalehkai kiba la pdiang burom da ka tnad Social Welfare ha Maw-diangum ki kynthup ïa ka Kong Margaret Pathaw, ka nongïakhun kti ba paw ym tang ha ka Jylla, hynrei ha ka ri hi baroh kawei kaba la ïoh ban khur ar tylli ki takma ksiar ha ka kyrdan Master 60 kg, ka Ibankyntiew Pamsad kaba la ïoh khur takma ksiar ha ka Junior 50kg, ka Victoria Nongshli kaba la ïoh khur takma ksiar bad rupa ha ka kyrdan senior 55kg, ka Anisha Kyrsian kaba la ïoh takma rupa ha ka Youth 50kg, ka Mihsngew -bha Rymbai kaba la ïoh takma rupa ha ka Grand Master 80kg, ka Dafica Syngkli kaba la ïoh ïa ka takma rupa ha ka Junior 55kg, ka Da-i-neshisha Makdoh kaba la khur takma rnong ha ka Sub Junior 60kg nalor kiwei kiwei de ki bym shym la lah ban khur takma.
Ka tnad Social Welfare hapoh ka jingïalam ka Kong N.F Sun, District Social Welfare Officer, ka la pynpaw ïa ka jingkmen kaba khraw halor ka jingwanrah nam bad burom ki ‘thei ïalehkai ka district hapoh ka jingïalam ka Kong Margaret Pathaw bad pdiang burom ruh ïa ki da ki jingai sngewbha kum shi bynta ban ai mynsiem bad pynshlur shuh shuh ba kin danglah ban ïalehkai bha bad wanrah nam bad burom ïa ka district bad ka Jylla ha ki jingïakhun ki ban sa long biang hadien.
Na ka liang ka Kong Margaret, kaba dei ruh ka nongrah ktien jong ka prokram Beti Bachao Beti Padhao ka tnad Social Welfare hapoh ka district, ka la ïathuh ba ka jingïakhun ha katei ka lympung kam dei satia kaba suk namar ka jingkylla bad jingpher ka suiñ bneng, hynrei watla katta ruh, ka jingsatar jong ki ‘rang bad ki ‘thei ïalehkai ka la pynlong ïa ki ban khur bun tylli ki takma.
Ka la pynpaw ruh ïa ka jingkmen ba kane ka jingleit ïakhun ka la sdang ban kiew sted ha ka Jylla bad kumba ka long mynta, ki ‘rang bad ‘thei ïalehkai ka Jylla ki dangpyntbit bad pynkhreh ïalade na ka bynta ban leit shim bynta pat ha ka World Championship ka ban sa long ha ka nongbah Delhi.
Ha kawei pat ka liang, ka Kong Margaret ka la pynpaw ïa ka jingsngewbynñiaw halor ka jingbym biang jong ki tiar ïalehkai na ka bynta ban hikai pyntbit ïa ki ‘rang bad ki ‘thei ïalehkai hapoh ka district, wat lada ka don ïa ka thong ban kyntiew ïa ki khun samla ka district ha kane ka jait jingïalehkai. Kumta na ka liang jong ka, ka buh ka jingkyrpad bad kyntu sha ki bor sorkar, ki seng ne ki ‘riew shimet ruh kumjuh kiba don ïa ka mynsiem ban ïarap bad kyntiew ïa kane ka jingïalehkai ba kin ïarap pynïoh ïa ki tiar kiba paka khnang ba kin ïoh ban pynkhreh bha na ka bynta ka World Championship ka ban sa long shen.
Ha kane kajuh hi ka sngi, na ka liang jong ka Confederation of Ri Bhoi People (CORP) hapoh ka jingïalam jong u Bah Pateng Myrsing kum u President ka la pdiang burom ïa kitei ki ‘thei ïalehkai hakhmat jong ka Ri Bhoi College da kaba ai da ki song syntiew. Ka seng ka la pynpaw ïa ka jingsngewsarong halor ka nam ka burom kaba kine ki ‘thei ïalehkai ka district hapoh ka jingïalam jong ka Kong Margaret, da kaba ïoh khur bun tylli ki takma.
