Guwahati, Jylliew:
U Myntri Rangbah ka Assam u Himanta Biswa Sarma ha ka 6 tarik, Jylliew, u la ong ba ki la don da ki lak tylli ki longïing ha kylleng ka jylla ki la pynurlong ïa ka jingangnud jong ki ban ïoh ïa ka ïing kaba paka lyngba ka jingtreikam jong ka skhim Pradhan Mantri Awas Yojana (PMAY), bad pynbna ba la mynjur sa 16,810 tylli ki ïing hapoh ka jingtreikam jong ka PMAY 2.0 ha Assam.
Haba ïasam ïa ka jingpynbna ha ka rynsan X, u Myntri Rangbah u la pynpaw ba ki jingmynjur bathymmai kin ïarap ban wanrah ïa ka jingshngaiñ, ka burom bad ka lawei kaba bha sha ki hajar tylli ki longïing kiba la kham bun ha ka jylla.
Katkum ka jingkheiñ ba la ïasam da u Myntri Rangbah ka Jylla, ka Assam ka la ïoh T.220.12 klur hapoh ka PMAY 2.0, katba sa 27,544 tylli ki ïing ki dang don mynta ha ka jingmynjur.
Ki jingkheiñ ba la ïohlum mynta ki long haduh ka 29 tarik u Jymmang, 2026.
U Sarma u la ai burom ïa kane ka jingthmu sha u Myntri Rangbahduh ka ri u Narendra Modi, da kaba pynpaw ba ka skhim shna ïing ka la pynkylla ïa ka jingim jong ki nongïoh myntoi bym lah kheiñ da kaba ai ïa ki ïing kiba neh bad pynbha ïa ka jinglong jingman ha kylleng ka Assam.
U Myntri Rangbah u la ong ba ki jingmynjur ba thymmai ki pyni ïa ka jingbteng jong ka sorkar ban pynthikna ïa ka jingshngaiñ ha ka ïing ka sem bad ban kyntiew ïa ka jinglong jingman jong ki longïing kiba dei hok ha kylleng ka jylla.
