Shillong, Jylliew 07
Ka Sorkar Jylla lyngba ka tnat ïalehkai ka la pynlut haduh T. 1.2 klur na ka bynta ka lympung 5th ïalehkai Megha-laya State League, kaba la poi sha kaba kut ha ka sngi Thohdieng jong ka taïew ba la lah.
Ïa kane la pynbna hi da u Myntri Rangbah ka Jylla u Conrad K Sangma hashwa ban sdang ka jingïalehkai final hapdeng ka Langsning FC bad ka Nongkseh SS&CC, kaba la rah ïa ka nam lahduh hadien ba ka la jop da 2-1 kol.
Na ka liang u Conrad u la pynpaw ba ka Sorkar ka don ïa ka thong ban kyntiew ïa ka jingïalehkai phutbol. “Ki jingïalehkai sports ki long ka bynta kaba kongsan na ka bynta ka Sorkar Jylla bad ka phutbol ka long kaba hakhlieh duh, te kumta ngi la pynlong ïa ki lympung ïalehkai ha la ki jong ki kyrdan.”
“Mynta ngi la tei ïa ka stadium kaba heh duh ha ka ri bad ïa kane ka projek yn sa lah ban pyndep ha ka por kaba biang.
Kum ban shu pynkynmaw ïa ka MSL la pynlong da ka Meghalaya Football Association (MFA) ha ryngkat ka jingkyrshan pura da ka tnat ïalehkai naduh u snem 2017. Mynta u snem ki la don 33 tylli ki kynhun na kylleng ki synjuk ïalehkai jong ki district kiba la pynïasoh sha ka MFA.
