Shillong, Jylliew 08
Ka lahduh jong ka Indian Football League (IFL) ka Diamond Harbour Football Club kan shah tohkit halor ki kam be-aiñ bad ka jingpynlut pisa kaba shyrkhei,” la pynpaw u Myntri ka tnat ïalehkai jong ka Sorkar West Bengal u Nisith Pramanik.
“Ngi la ïoh shibun ki jingujor pyrshah ïa ka Diamond Harbour FC kiba la buh jingkylli la kane ka klob ka seng ne em katkum ki kyndon ba la buh. Ki don ruh ki jingkynnoh ha kaba ïadei bad ka jingpynlut pisa kiba la long kum ka umsaw namar ka la long shaba palat. Ïa kine baroh ki bynta yn dang bishar bniah,” la pynpaw u Pramanik ha ki lad pathai khubor.
Ïa ka DHFC la seng ha u snem 2022 ha kaba la long trai da u Abhishek Banerjee, uba long u dkhot ka Parliament na ka seng Trinamool Congress bad uba long ruh u General Secretary jong kane ka seng saiñ pyrthei.
Kane ka kynhun ïalehkai phutbol kaba na West Bengal la ong ba ka la kiew kyrdan kynsan ha kine ki saw snem ba la lah, da kaba kam shym la ïashim bynta shwa ha ka I-League 3, I-League 2, hynrei ka la bat ïa ka nam lahduh ha ka IFL 2025-26 bad mynta ka la kiew kyrdan sha ka Indian Super League.
U Pramanik u la pynpaw ba ki la don ruh ki jingujor halor ka madan ïalehkai jong kane ka klob. “Yn sa leh ïa kaba donkam halor ka jinglap jong ka jingtohkit bad shen yn sa pynpaw paidbah”.
“Ngi kwah ba kawei pa kawei ka klob kan ïalehkai bha bad kan kiew shaphrang. Hynrei lada lap ïa kino kino ki klob kiba leh ïa ki kam be-aiñ yn ym ailad ïa ki,” u la bynrap.
Lyngba kane ka jingshah tohkit ka la wanrah ka jingartatien halor ka jingïashim bynta kane ka klob ha ka ISL. Te kumta ka Shillong Lajong FC kaba la wan ha ka kyrdan ba-ar, ka lah ban ïoh jaka ban mih bujli ha ka jaka katei ka klob na West Bengal sha katei ka lympung ïalehkai kaba hakhlieh duh jong ka ri.
