Shillong, Jylliew 09
Ka lympung ïalehkai SRGT Third Division Football League 2026 ban pynïaid da ka Shillong Sports Association (SSA) kan sdang naduh 16 tarik mynta u bnai ha kaba yn pynlong ha SSA Stadium bad ha madan MFA kaba ha Third Ground, Polo.
Kin don 16 tylli ki kynhun ki ban shim bynta ha kane ka lympung bad yn phiah ïa ki ha ki saw tylli ki group. Ha ka Group-A ki kynthup ïa ka Mawlynrei SC, Nongumlong, Umïew Maw U Sam bad ka Lamlynti FC. Ha ka Group-B ki long ka Umphyrnai, Lummawbah, Lawmali Pyllun bad ka Kharang SC. Ha ka Group-C ki long ka Mawkasiang, Pomlakrai, Ïatylli bad ka Rynjah SC. Katba ka Umpling, Lapalang, Lumparing bad ka Sanmer SC ki la don ha ka Group-D.
Ki kynhun ki ban ïakhun nyngkong ha katei ka sngi sdang kin long hapdeng ka Nongumlong pyrshah ïa ka Mawlynrei ha ka por 1 baje, katba ka Umïew Maw U Sam ïa ka Lamlynti ha ka por 4 baje nohphai sngi. Ïa kine ki jingïalehkai yn pynlong ha SSA Stadium.
