Shillong, Jylliew 09
Sa shisien pat ka Meghalaya State Olympic Association (MSOA) Ka la wan shakhmat ban pynbna paidbah ba kan pynlong ïa ka jingïakop mareh 10k Olympic Day Run na ka bynta ki samla shynrang bad kynthei kiba la 17 snem shaneng.
Kane ka jingïakop ka long shi bynta ban rakhe ïa ka Olympic Day, ha ka 27 tarik mynta u bnai. Kane ka synjuk ka la pyntip ba ha kaba ïadei bad ki lynti ban mareh kin long kumjuh kumba long ha u snem ba la lah.
Kane ka synjuk lyngba ka kyrwoh ba la pyllait da u General Secretary Bah Finely Lad Pariat, la ong ba la pynkhreh ïa ki khusnam pisa na ka bynta ki nongjop kaba long T. 5,000, T. 3000, T. 2000 ïa kiba wan ba nyngkong, ba-ar bad balai nalor san tylli ki khusnam pisa ba mar T.500 ïa kiba ïoh ‘consolation’. La pynkhreh ruh ïa ki khusnam kyrpang na ka bynta kiba la 55 snem shaneng kiba lah ban pyndep pura ïa ka jingmareh.
La ong ruh ba yn pynbiang ïa ki jingbam tehkpoh hadien ba la dep ka jingïamareh bad yn sam ei ruh ïa ki t-shirt ha katei ka sngi shwa ban sdang ka jingïakop. Ym donkam ban siew eiei halor ka jingpynrung kyrteng ki nongshim bynta ka ban long ha shlem treikam jong ka MSOA ha JN stadium naduh 2 haduh 5 baje janmiet. Na ka bynta ki jingtip ba bniah ki lah ban phone ha u number 98560 41365, 97740 62118 lane 94361 02663.
