Shillong, Jylliew 09
Kin don haduh saw jur ki rangïalehkai kiba shipara ki ban ïashim bynta ha ka FIFA World Cup 2026, hynrei kin mihkhmat ïa la ki jong ki ri.
Ki khana jong ki, ki pyni kumno ka jingwan buhai shnong ka la ktah ïa ka phutbol jong kane ka juk bad ka la wanrah ki jingïadei kiba kyrpang bad ki ri ka pyrthei. Kawei na ki nuksa ka dei ki ar ngut shipara kiba la kha ha France, hynrei ki ïalehkai na la ki jong ki ri. U para u Desire Doue, uba dei u khlur ïalehkai ba paw ka Paris Saint-Germain, un mihkhmat ïa ka France, katba u hynmen jong u, u Guela Doue, un ïalehkai ha ka bynta kaba shadien na ka bynta ka Ivory Coast, kaba long ka shnong trai u kpa jong ki.
Kumjuh kiwei pat ki ar ngut shipara ki la mih-khmat na la ki jong ki ri jong ki, ha kaba ïa u Inaki bad u Nico Williams la kha ha Spain. U Nico, uba la 23 snem ka rta, u la mihkhmat ïa ka Spain ha ka European Championship kaba la jop ïa ka England ha ki ar snem ba la lah bad u la ïohpdiang ïa ka nam Player of the Match ha ka jingïakhun final.
Katba u hynmen (Inaki Williams), u ban sa kynjoh sha ki 32 snem ka rta ha ka taïew ban wan, u la ïoh ban mihkhmat shisien na ka bynta ka Spain ha ka jingïalehkai paralok. Hadien, u la jied ban mihkhmat noh na ka kynhun ïalehkai jong ka Ghana, kaba long ka ri ïa kaba la kha ïa ki kmie ki kpa jong ki.
Ka kynhun ïalehkai World Cup jong ka Ghana ka la kynthup ïa u rangïalehkai ‘dien ba la kha na Netherlands u Derrick Luckassen, uba la shah khot kum u nongbujli namar ka jingmynsaw bad un ïadon bynta lang bad u para jong u, u Brian Brobbey, ha katei ka lympung.
Katba, u Brobbey u dei u rangïalehkai ‘dien jong ka Netherlands bad u poi hadien ba u la ïalehkai bha ha ka kylla miet jong ka samoi ïalehkai Premier League na ka Sunderland. Kine ki shipara ki dei na kajuh ka kmie bad la ki jong ki kpa.
Sa kiwei pat kiba shipara ki dei u Harry bad u John Souttar. U Harry, uba dei u rangïalehkai ‘dien ba dang 27 snem ka rta bad uba la kha ha Scotland, u mihkhmat ïa ka Australia, katba u hynmen jong u, u John, u ïalehkai na ka bynta ka Scotland. Ïa kine baroh arngut la kha ha Aberdeen, hynrei ka kmie jong ki ka dei kaba na Australia. U Harry u la jied ban ïalehkai na ka bynta ka Australia ha ki hynñiew snem mynshwa ha kaba kham hashwa u la mihkhmat ïa ka Scotland ha ka kyrdan ‘youth level’.
Na baroh kine ki rangïalehkai kiba shipara kim shym la ïakynduh pyrshah ha ki jingïalehkai group jong kane ka lympung ka ban long ha Canada, Mexico bad United States.
