Shillong, Jylliew 09
Ka Phir Kurbah M SC ka la pynjem khnap ïa ka Imson SC haduh 6-0 kol na ka bynta ban khur khur jingjop ha ka lympung ïalehkai SSA U-20 4th Division Football League 2026, ha ka sngi Ba-ar.
Ha kane ka jingïakhun kaba la long ha madan MFA kaba ha Polo, u Meban Janong u la khur ïa ka hat-trick hadien ba u la ïoh ban thep ha ka minit kaba 34, 45 & 61. Katba ïa kiwei la thep da u Nijestar Sunn (38) bad u Elban Kurbah (40+2). Kham hashwa kane ka kynhun ka la ïoh ei shi kol naba ïarap pynthep u rangïalehkai ka Imson u Mebankyrshan Kharbhoi ha ka minit kaba 33.
Ha ka jingïalehkai kaba la long ha SSA Stadium, ka Don Bosco Academy (DBA) ka la khur ei 3 poiñ bad 3-0 kol na ka daw ba ka kynhun ïalehkai ka liang pyrshah ka Lumpyngngad kam shym la wan mih madan bad ka la jop da ka walkover.
Haba phai sha ka jingïakhun kaba la long kham hashwa, ka Lumkseh SC ka la jop da 2-0 kol ïa ka Riatsamthiah SC. Ïa kine la thep da u Jonistar Kharpran ha ka minit kaba 40+2 bad u Banteinam Khonglam (51).
Ha ka sngi Balang ka jingïalehkai kan long hapdeng ka Mawlyngngad SC pyrshah ïa ka Nongthymmai S&CC ha ka por 1 baje mynsngi bad ka Mawpdang SC ïa ka Thynroit SC ha ka por 4 baje nohphai sngi. Kine ki jingïakhun kin long ha SSA Stadium. Katba ha madan MFA ka Madanrting kan ïakynduh pyrshah ïa ka Weilyngkut Area FCC ha ka por 4 baje nohphai sngi.
