Nongstoiñ, Jylliew 09
Ka synjuk ïalehkai jong ka Siejlieh Sport Social and Cultural Youth Organisation ha ryngkat ka Seng Samla Dong Mawïaban bad kiwei kiwei, ha ka lah sngi U Blei ki la pdiang burom ïa ka Lasiewdor Syiemlieh kaba la khur ïa ka takma rupa ha ka 4th National Armwrestling & Para Arm Wrestling Championship 2026 kaba la long ha Ahmedabad, Gujarat.
Kane ka heprit kaba dei ka khun jong ka Kong Ismondalis bad Bah Polee Lyngdoh, ka la wanrah nam bad burom ïa ka shnong bad ïa ka Jylla hi baroh kawei da kaba khur ïa katei ka takma.
Na ka liang u Bah Khrawbok Kharlyngdoh, Rangbah Dong ka Mawïaban u la ong ba kane ka long ka jingsngew sarong shisha ïa ka shnong hi baroh kawei ha kaba ka shnong kat nangmih ki sngi ka la nangsakhi bad ïohi ba bun ki khun samla ki la sdang ban mih kum ki khlur ha kaba dangshen ruh la don kawei ka samla na kane ka shnong kaba la khur haduh 2 tylli ki takma rnong.
U la ong ruh ba ka dong ka ai mynsiem shuh shuh ïa ka Lasiewdor na ka bynta ka jingpynkhreh ban leit ïashim bynta sa sha ka lympung ïalehkai shabar ri ka ban long mynta u snem 2026.
Kum ban shu pynkynmaw dangshen shwa ba katei ka samla kan leit ïashim bynta ban mihkhmat ïa ka jylla Meghalaya sha katei ka lympung, ki nongïalam ka Siejlieh Sport Social and Cultural Youth Organisation ryngkat ki nongkitkam jong ka Dong Mawïaban ki la leit ïakynduh bad ai mynsiem ïa ka Lasiewdor namar ka dei ruh kaba dangkham rit ka rta kaba dei tang ha ka thup jong ka kyrdan sub junior.
