Aizawl, Jylliew:
U President ka seng BJP ha Mizoram, u Beichhua, ha ka lah sngi U Blei, u la kam ba ka sorkar NDA ba la ïalam da u Myntri Rangbahduh ka ri, u Narendra Modi, ka la pynneh ïa ka rekod kaba khlem don ka bamsap ha ka sorkar pdeng, ha kine ki 12 snem ba la dep, da kaba pynskhem ba ym shym la don uwei ruh u Myntri ka sorkar pdeng, uba la shah pynngat ha kano kano ka kam bamsap ha kine ki por.
Haba kren ha kawei ka jingïalang jong ka seng ha ka ophis treikam jong ka seng BJP ha Aizawl, u Beichhua uba dei ruh u MLA u la ong ba ka jingbym don ki jingkynnoh bamsap pyrshah ïa ki Myntri ka sorkar pdeng ka pyni ïa ka jinglong ba janai bad treikam bha jong ka sorkar ba la ïalam da u Narendra Modi.
“Hapoh ka jingïalam jong u Myntri Rangbahduh ka ri u Modi, ym don uwei ruh u Myntri ka sorkar pdeng na ka BJP ne ka kynhun synrop NDA uba la mad ïa ki jingshah kynnoh bamsap. Kane ka rekod kaba khuid ka pyni ïa ka jinglong hok bad jingtreikam jong ka sorkar,” u la ong.
U nongïalam ka BJP u la ong ba ka jingpynksan jong ka sorkar pdeng ïa ka jingsynshar kaba khuid ka la don ka bynta kaba khraw ha ka roi ka par bad ka jingkiew shaphrang jong ka ri.
Katkum ka jingong jong u Beichhua, ka sorkar Modi ka la trei beit ban pynduh jait ïa ka bamsap da kaba pynkhlaiñ ïa ki rukom treikam bad pynthikna ïa ka jingkitkhlieh kaba kham khraw ha kaba ai ïa ki jingshakri paidbah.
U la kdew ïa ka rukom ai jingmyntoi (Direct Benefit Transfer) da kaba kam ba ka la ïarap ban tehlakam ïa ka jingtuid bad pynduna ïa ka jingbamsap da kaba pynthikna ba ki jingmyntoi jong ka sorkar kin poi beit sha ki nongïoh jingmyntoi.
“Ka sorkar ka la shim ïa ki lad ki lynti ban pynthikna ba ka pisa kan ym jah ha ka lynti. Kane ka la pynduna shibun ïa ka jingpyndonkam bakla bad ka la ïarap ban pynim ïa ki marpoh khyndew kiba bun,” u la ong.
U Beichhua u la ïaroh ruh ïa ka bynta jong ki tnad tohkit jong ka pdeng kum ka Central Bureau of Investigation (CBI) bad ka Enforcement Directorate (ED) ha kaba ïakhun pyrshah ïa ki kam bamsap bad ki jingpyndonkam bakla ha ka liang ka pisa tyngka.
Haba ïadei bad kawei ka mukotduma kaba dang shen kaba la kynnoh ba ka don ka jingïadei bad ka Mizoram bad ka Myanmar, u la kam ba la lap ïa ki rukom leit rukom wan jong ka pisa kiba shongdor kumba 970 klur tyngka lyngba ka jingpyndonkam bakla ïa ki e-way bill.
Haba batai ïa katei ka kam kum kaba khia, u nongïalam ka BJP u la kyntu ïa ki briew ban long kiba husiar bad ban kiar na ka jingshah ktah ha ki lad jingïarap pisa bad ki kam beaiñ.
Kane ka jingkren jong u ka la mih ha ka prokram jong ka seng kaba la pynlong ha Aizawl, ha kaba ki nongïalam ka BJP ki la pynpaw ïa ki jingthmu synshar jong ka sorkar pdeng bad ki lad jingïada na ka bamsap.
