Shillong, Jylliew 10
Ka International Federation of Association Football (FIFA) ka la sdang ïa ka wat kaba khatduh jong ka prokram ai jinghikai ïa ki rephri na ka bynta ka jingpynkhreh ïa ka World Cup 2026, ha kaba ki la don 170 ngut ki rephri kiba la ïalum lang ha Miami, USA.
Ïa kane ka prokram ai jinghikai kaba la neh shiphew sngi la pynwandur khnang ba kin long ba la khreh ban shimti kum ki nongpynïaid ha kane ka lympung ïalehkai phutbol kaba heh ha ka pyrthei khamtam haba ki shim ïa ki rai ha ki jingïalehkai kiba kongsan bad ruh ban bud ïa ki kyndon ba thymmai jong ka FIFA ha ki 104 tylli ki jingïalehkai jong kane ka lympung, ka ban long ha kylleng ka North America.
U President ka FIFA u Gianni Infantino, u la pynpaw ïa kine ki rephri kum “kiba kynsai na kiba kynsai tam,” da kaba pynksan ïa ka jinglong ba kyrpang jong ki ha kane ka lympung. U la ong, “Ki dei ban long kiba la pynkhreh na ka bynta kane ka por kaba kyrpang, ha kane ka jingïalehkai kaba kyrpang, haba ki hap ban shim ïa ka rai ba kongsan.”
