Guwahati, Jylliew:
Ki la don saw ngut ki nongtrei jong ka phatok kiba la shahkem halor ka jingkynnoh ba ki la pynsuk ha ka ban pynpoi ïa ki tiar ba la khang pyrshah hapoh patok, kynthup ïa ki mobile phone bad kiwei kiwei ki tiar ba la khang, kane ka la jia hapoh Sribhumi District Jail, la ïathuh ki pulit.
Kine kiba la shah kem ki long ki Assistant Jail Superintendent kiba kynthup ïa u Rudra Deuri, u Biswajit Barua, u Head Warder u Musahid Ali Laskar, bad u Warder u Subhashish Ghosh.
Hadien kane, la leit rah ïa ki sha ïing kashari ha Sribhumi bad la set phatok ïa ki. Ka kashari ka la bthah ba dei ban ïalam ïa ki sha ïing kashari ha Guwahati ha ka 12 tarik, Jylliew. Ki pulit ki la ïathuh ba kitei ki nongshah kynnoh ki donkti ban ai mobile, ki duma bad ki tiar ba nep sha ki koidi naba ki la ïoh bainong da ka pisa.
U Additional Superintendent of Police u Trinayan Bhuiyan u la ong ba la pynlong ïa ka jingkhynra ha katei ka phatok jong ka distrik ha ka 2 tarik u Rymphang da ka kynhun pulit ba la ïalam da ka Senior Superintendent of Police ka Leena Doley. Ha kane ka jingkhynra la ïoh kurup haduh 29 tylli ki mobile phone na ki koidi, ha ryngkat ki charger, ki tiar kiba nep, ki hookah, ki biri, ki sikret, ki lighter bad kiwei kiwei ki tiar ba la khang pyrshah.
