Shillong, Jylliew 11
Ka Meghalaya Taekwondo Sport Association (MTSA), ha ryngkat ka jingïatreilang bad ka Taekwondo Institute of Meghalaya (TIM), ha ka 7 tarik mynta u bnai ka la rakhe ïa ka jingdap 50 snem jong ka jingshakri jong ka hapoh ka jing-ïalam u U.N Shukla.
U Shukla u dei u nongsdang ïa kane ka jingïalehkai bad u long ruh u nongïalehkai uba nyngkong eh ïa ka Jylla ban mihkhmat ïa ka ri India ha u snem 1982. U la khur takma nyngkong eh ha ki jingïalehkai shabar ri ha u snem 1983-84, u la bat ruh kum u International Refe-ree, International Master, bad ïa ka 5th Dan Black Belt na Kukkiwon, South Korea.
Ïa kane ka jingïalang la pynlong ha Babu Mani Singh Gurung Auditorium kaba ha Gorkha Patshala Higher Secondary School Garikhana, Shillong ha kaba ka la ai burom ïa ki jingnoh synñiang kiba khraw jong u ban kyntiew ïa kane ka jingïalehkai Taekwondo ha kane ka thaiñ naduh u snem 1976. La pynkut ïa kane ka jingrakhe da ka jingïalang ai khusnam ha ka Kukkiwon Black Belt, ha kaba la pynkup burom ïa ki 17 ngut na ka Jylla kiba la bat ïa ki kyrdan.
Ki nongïalehkai kiba la ïoh ïa ka kyrdan 1st Dan ki kynthup ïa u Kiran Shekhawat, Retika Paul, Soumyajeet Paul, Ranchita Paul, Neha Shukla, Anant Narayan Shukla, Herwood Thabah, Vastab Sarkar, Akansh Barua bad u Manvik Agarwal. Kiba la bat ïa ka 2nd Dan ki long u P.G. Jyrwa, Ravi Thabah, Shahjahan Hussain, Aman Shukla bad u Subir Paul. Ïa ka 3rd Dan la ïoh da u Amal Chakravorty bad u Prem Narayan Shukla.
Ka MTSA ka la lem burom ruh ïa u (l) Master Luthre Lohar bad ïa baroh kiba la khlad noh ki nongïalehkai kiba la ïoh ïa ka kyrdan black belt ha ka jingïalehkai Taekwondo, da kaba burom ïa ka pateng ba neh jong ki ha kane ka jingïalehkai.
Shuh shuh ka synjuk ka la ai khublei kyrpang ïa baroh ki samla kiba la jop bad pynpaw ruh ka jingsngewnguh ïa ki bahaïing hasem bad ki nongkyrshan jong ki, namar ka jingkyrshan bad jingshaniah jong ki ha kine ki snem ba la leit.
