Itanagar, Jylliew:
Ka jingkulmar kaba la mih thymmai ka la ktah ïa ka Upper Siang distrik jong ka Arunachal Pradesh hadien ba katto katne ngut ki nongshong shnong kiba dang shen ki la kyrshan ïa ka jingwad bniah shwa ïa ka jingtreikam ïa ka Siang Upper Multipurpose Project (SUMP) la ïathuh ba ki la shah thombor ha ki nongïakhih pyrshah dam.
Katkum ki tyllong khubor na ka thaiñ, la kynnoh ba ki nongïakhih ki la pynjulor ïa ki jingdon jingem jong palat arphew ngut ki briew ha Geku ha ka lah sngi U Blei. Napdeng kiba shah ktah ka dei ka ïing sah jong u nongthaw aiñ jong ka thaiñ u Oni Panyang, uba la donlang ha ka por ba soi ïa ka jingïateh kular kaba kyrshan ïa ka jingbishar bniah shwa ban pyntreikam ïa ka projek.
Ki heh sorkar ki la ïathuh ba ki jingkulmar ki la mih tang hadien ka jingïalang jong ki kynhun pyrshah ban pyntreikam ïa ka dam ha katei ka thaiñ. Hadien katei ka jingïalang, la kynnoh ba kawei ka bynta jong ki paidbah ki la ïaid lyngba katei ka thaiñ bad ki la pynjulor ïa ki ïing jong ki longïing kiba la kyrshan ïa katei ka jingthmu kaba ïadei bad katei ka projek.
Katba ym pat shym la ujor ejahar pura na ki pulit ha ka por ba pyntip, ki bor synshar ki dang ïashim bynta ban khanglad ïa ka jingjur shuh shuh bad ban pynphai biang ïa ka jinglong jingman. Ki tnad pahara bad ki heh jong ka distrik ki dang buddien bha ïa kane ka jinglong jingman hapdeng ka jingïakynad kaba nang jur.
