Shillong, Jylliew 12
Ka lympung ïalehkai phutbol kaba heh duh ha ka pyrthei (2026 FIFA World Cup) hadien saw snem ka la wan phai bad sdang biang ha ka 12 tarik Jylliew 2026, ka la sdang thikna da ka jingplie paidbah kaba heh bad itynnad bha ha ka nongbah Mexico City. Kane ka jingïalang ka la pynïasoh lang ïa ka tynrai jong ka phutbol bad ki jingrwai pyrthei.
Ka Shakira, ka nongrwai kaba paw bha kaba dei ruh ka nongjop Grammy haduh saw sien, kaba la tip paidbah kum ka “Queen of Latin Music”, ka la long kaba kongsan ha kaba pynshongshit ha kane ka lympung shwa ka jingïalehkai ryngkat bad u Burna Boy, u nongrwai nongtem ka Afrobeats jong ka Nigeria. Ki la pynshongshit da ka jingrwai “Dai Dai,” ka jingrwai ba pawnam jong kane ka lympung.
Ka jingshad ka la pynkylla ïa ka madan sha ka rynsan kaba heh bha kaba don ïa ka trophi kaba heh bha jong ka World Cup, ki nongshad kiba itynnad, bad ki jingpynwandur kiba pynngam jylliew ha khmat ka madan kaba la dap da ki briew. Ka jingpyni ka la khring ïa kiba bun naduh ki nongpeit online.
Da kaba rakhe ïa ka kolshor jong ka Mexico, ka jingrakhe lehkmen ka la sdang 90 minit shwa ka jingïalehkai ba sdang bad ka jingïalehkai kaba la pynïasoh bha ïa ka pateng jong ka thaiñ. Nalor ki jingrwai ‘pop’ jong kylleng ka pyrthei, ha kane ka jingïalang la pynshongshit ruh da ki nongrwai ba pawnam jong ka thaiñ: u Alejandro Fernández, Lila Downs, Belinda, Danny Ocean, Mana bad Los Ángeles Azules .
Ka “Trilogy” ne ki lai bynta jong ki jingrakhe plie paidbah kane ka lympung, namar ba la iasam ha ki lai tylli ki ri, ka FIFA ka pyndonkam ïa ka rukom rakhe kaba bun ki kyrdan kaba khlem pat ju jia mynno mynno ruh ban ïa kawei ka jinglehkmen: Ka Nongbah Mexico (12 tarik u Jylliew): ha madan Estadio Azteca, ha Toronto (13 Jylliew) ha madan BMO Field bad ha Los Angeles: ha SoFi Stadium.
Hadien kane ka jinglehkmen, ka ri nongpdiang ïa kane ka lympung ka Mexico ka la jop ïa ka jingïalehkai ba sdang jong ka Group A da 2-0 kol pyrshah ïa ka South Africa ha ka jingïalehkai kaba itynnad bad kaba jwat bha ha kaba la mih haduh lai tylli ‘red card tang na kane ka jingïalehkai.
U Julián Quiñones ka Mexico u la pyndonkam ïa ka jingbakla ba sdang jong ka jingïada na South Africa, ha kaba u la thep ïa ka kol ha ka minit ba 9 kaba long ruh ka kol kaba nyngkong eh jong ka World Cup 2026. Katba ha ka minit ba 67 u rangïalehkai ba la rim bha u Raúl Jiménez u la pynskhem ïa ka jingjop da kaba thep ïa ka kol kaba la buh bha da u Roberto Alvarado, kaba long ruh ka kol kaba nyngkong eh jong u ha ka World Cup.
Katba ka Mexico ka la khlaiñ bha ha ka jingïalehkai, ka jingïalehkai ka la hiar sha ka jingkulmar kaba pura ha ka kylla miet. Ha kaba lai tylli ki red card ki la mih: kata u Sphephelo Sithole, u Themba Zwane ka South Africa bad u César Montes ka Mexico ki long ki ‘ranglehkai ki ba la shah ai red card.
Ka jingïalehkai kaba ar jong kane ka lympung ka la long hapdeng ka South Korea pyrshah ïa ka Czechia ha ka 12 Jylliew 2026 ha Guadalajara Stadium ha Mexico, kaba la pyni ïa ka jingwanphai kaba phylla, ha kaba ka South Korea ka la pynliem ïa ka Czechia da 2-1 kol. Kane ka jingjop ka la pynpra ïa ka jingeh kaba la neh 16 snem na ka bynta ki ranglehkai ka Korea, kaba dei ka jingjop kaba nyngkong jong ki ha ka jingïalehkai ba nyngkong jong ka World Cup naduh u snem 2010.
Hadien ka jingïalehkai kaba khlem lah thep kol ha ka kylla step, ka jingïalehkai ka la sdang itynnad ha ka kylla miet ha kaba ha ka minit kaba 59 u kapten jong ka Czech u Ladislav Krej?í u la pynpra ïa ka jingïakhun da kaba thep ïa ka kol kaba nyngkong ha kane ka jingïalehkai. Katba ha ka minit kaba 67 Ka South Korea ka la pynphai kylla stet bha. U rangïalehkai pdeng u Hwang In-beom u la shim ïa ka bol na u Lee Kang-in bad ïoh ban thep ïa ka kol bad lah ban pynïaryngkat ïa ka jingïalehkai.
Ha ka minit ba 80 ka South Korea ka la ïakhun tyngeh ha kaba u ranglehkai bujli u Hyeon-gyu, u la thep ïa ka kol ba wanrah jingjop ïa ka kynhun da 2-1 kol.
Ka South Korea kan ïakhun pyrshah ïa ka Mexico ha ka sngi Palei ban wan na bynta ban ïaknieh kyrdan ha ka group, katba ka Czechia kan ïakynduh pyrshah ïa ka South Africa ha Atlanta.
Ha ka 13 Jylliew 2026 na ka Group B ka Canada kan ïakhun pyrshah ïa ka Bosnia and Herzegovina katba ha kawei pat ka jingïalehkai ka United States pyrshah ïa ka Paraguay jong ka Group D.
