Agartala, Jylliew:
U Myntri ka Social Welfare and Social Education jong ka Tripura u Tinku Roy, ha ka 9 tarik u Jylliew, u la ong ba ka jingpyrshang ba ïatreilang jong ka bor synshar bad ki nongkyrshan bapher bapher ka la ïarap ban khanglad ïa ki 9,982 tylli ki jingshongkha khynnah ha kylleng ka jylla ha u snem mang tyngka 2025-26.
Haba kren ha ka jingïalang bad ki nongthoh khubor ha Agartala, u Roy u la ong ba ka jingshah khanglad ban shongkha khynnah ka la nang kiew stet namar ka jingïatreilang kaba biang hapdeng ki bor synshar distrik, ki pulit, ki gram panchayat bad ki kynhun kiba dei ban peit ïa ka bha ka miat jong ki khynnah.
“Ha u snem 2025-26, haduh 9,982 tylli ki jingshongkha khynnah la lah ban khanglad da baroh ki nongïarap halor kane ka bynta ha ka jylla, watla ngim don ïa ki jingtip kiba thikna shaphang ki jingshongkha khynnah kiba la jia shisha,” u la ong.
U Myntri u la kdew ba ka jingshongkha khynnah ka dang ïai bteng ban long ka jingeh ha ki jaka kum ka Sonamura subdivision ha Sepahijala district bad ka Kailashahar ha Unakoti distrik.
U la ong ba ki jaka treikam ba kynthup ïa ki Child Welfare Committee, katto katne ki seng treimon sngewbha bad ka Tripura Child Rights Commission ki dang trei shitom ban khanglad ïa kane ka jingleh.
U Roy u la pynpaw ruh ïa ki jingkylla ha ki jingtei jong ka Anganwadi jong ka jylla. U la ong ba la pynbiang ïa ka bording ha palat 3000 tylli ki Anganwadi Centre na ki jan 10 hajar tylli ha kylleng ka Tripura, katba ki jaka ba dang sah la khmih lynti ba kin ïoh ïa ka bording ha kane ka snem mang tyngka ba mynta.
Nalor kata, kumba 100 tylli ki jaka hikai Anganwadi kiba ju pyndonkam da ki jingai jinghikai ha ka ktien Bengali la pynkylla sha ka jinghikai ha ka ktien phareng hadien ka jingkyrpad na ki kmie ki kpa bad ki nongsumar jong ki khynnah.
Katkum ka jingong jong u Myntri, la khmih lynti ba kane ka jingkylla kan ïarap ïa ki khynnah na ki Anganwadi Centre ban ïoh rung sha ki Skul Vidyajyoti khlem da ïakynduh ïa ki jingeh kiba ïadei bad ka ktien.
Ka Tripura ka dei napdeng ki katto katne tylli ki jylla, kynthup ïa ka Assam, Bihar, Jharkhand, Rajasthan, Telangana bad West Bengal, ha kaba ka jingjyllei jong ka jingshongkha khynnah ka dang sah ha kaba ka la tam palat ïa ka jingdon jong kum kine ha ka ri baroh kawei.
