Imphal, Jylliew:
U Myntri ka tnat ki kam pohïing jong ka jylla Manipur u Govindas Konthoujam ha ka 11 tarik u Jylliew, u la ong ba ka jingpynpoi ba dang shen ïa ar tylli ki kynhun shipai Commando Battalion for Resolute Action (COBRA) jong ka CRPF kan ïarap ban pynbha ïa ka suk ka saiñ ha ka jylla.
Haba kren sha ki nongthoh khubor ha Jawaharlal Nehru Institute of Medical Sciences hadien ba la ïakynduh ïa kiba haïing hasem jong ki 6 ngut ki briew kiba dei ki Naga ha kaba ïa ki metïap jong ki la buh ha ka jaka buh metïap ha ka jylla, u Konthoujam u la ong ba ki bor pahara ha ka jylla ki long kiba duna hynrei ka jingwan jong ki shipai ba kyrpang kan pynkhlaiñ ïa ki jingtreikam.
“Ngi don tang khyndiat eh ki bor pahara. Hynrei mynta da ka jingpynpoi ba dang shen ïa ar tylli ki kynhun shipai COBRA, nga tharai ba ka jinglong jingman kan sa nangbha,” u la ong. ”
U Konthoujam u la batai ïa ka jingshah pynïap jong ki hynriew ngut ki Naga kum ka “kam runar kaba khlem pat ju jia mynno mynno ruh bad kaba shyrkhei” bad u la pynthikna ba ïa kiba donkti yn pynngat ha ka aiñ.”Ngi kut jingmut ban kem ïa ki nongleh kam sniew bad ban pynshitom ïa kito ki bym don ïa ka jingsngew para briew,” u la ong.
U la pdiang bad sngewkmen halor ka jingshah pyllait jong ki 14 ngut ki Kuki ïa kiba la shah pynshisha ba ki la shah rahbor ha ki kynhun kieng atiar jong ki Naga, ha kaba la ong ba ka la wanrah ïa ka jingsngew para briew.
Ki 6 ngut kiba la shah pynïap ki dei kiba la shah rahbor na ka shnong Leilon Vaiphei kaba don ha Kangpokpi distrik, ha ka 13 tarik, Jymmang bad la lap ïa ki metïap jong ki shi sngi hadien ka jingshah pyllait jong ki 14 ngut, kiba la shah rahbor ha ki kynhun kieng atiar ha Senapati distrik la jan shibnai hashwa, kine ki la shah pyllait ha ka 9 tarik, Jylliew.
