Guwahati, Jylliew:
Kum shi bynta jong ka jingthmu ban pynbha ïa ka jinglah ban ïoh ïa ka jingpule na ka bynta ki khynnah kiba sah ha ki jaka ba don ki kper slasha, ka sorkar Assam ka la pynbha ban pyllait ïa ka bai leit bai wan na ka bynta ki khynnah skul kiba na ki kynhun rep slasha kiba wan na ki jaka ba kham sha kyndong bad kiba jngai na ka sor.
Haba pynbna ïa kane ka prokram ha ka sngi Balang, u Myntri ka tnat pule puthi u Ranoj Pegu u la ong ba kane ka skhim kan kynthup ïa palat 9,700 ngut ki khynnah skul kiba pule ha ka klas I haduh X ha kylleng ki 198 tylli ki skul kiba don ha ki 11 tylli ki distrik jong ka jylla.
Katei ka jingthmu, kaba la pyntreikam hapoh ka Samagra Shiksha Assam, ka thmu ban weng ïa ki jingeh ha ka leit ka wan, kiba ju khanglad ïa ka jingleit skul kaba man ka por hapdeng ki khynnah kiba sah ha ki jaka ba jngai jong ki kper slasha.
Ban pynthikna ba ym don khynnah ba pep skul na ka daw ka jingeh ha ka leit ka wan, ka @Samagra_Assam ka la plie paidbah ïa ka Transport/Escort Facility na ka bynta ki khynnah skul ha ki Tea Garden Areas naduh ka 10 tarik u Jylliew, 2026.
U Myntri Rangbah ka jylla u Himanta Biswa Sarma u la batai ïa kane ka prokram kum ka sienjam kaba kongsan bha ban pynthikna ba ym dei ban don iwei ruh i khynnah skul i ban shah pynduh jingnang jingstad namar ka jingeh ban poi sha skul.
Hapoh kane ka skhim, ki khynnah pule kiba dei hok ba kin ïoh ïa ka jingïarap ha ka leit ka wan kaba long T.5,400 marwei na ka bynta u snem ka pule-puthi. Kane ka prokram kan treikam naduh ka 10 tarik u Jylliew, 2026, haduh ka 31 tarik u Lber, 2027, lait noh tang ha u bnai Naitung, 2026.
Ka jingkitkhlieh ban pynbeit ïa ki jingshakri ha ka leit ka wan jong ki khynnah skul, ka shong ha ka School Management Committees and School Management and Development Committees (SMCs/SMDCs) kaba ha kane ka thaiñ, na ka bynta ban pyntikna ha ka ban pyntreikam ïa kane ka skhim naduh basdang.
Katkum ka jingong jong u Pegu, la khmih lynti ba kane ka jingthmu kan pynlong ïa ka jingleit jingwan man ka sngi sha skul kaba kham shngaiñ bad kaba suk, katba kan pynshlur ïa ka jingwan skul man ka por bad kan pynbha ïa ka jingïoh jinghikai na ka bynta ki khynnah skul ha ki jaka rep slasha.
