Jowai, Jylliew 14
U Myntri ka tnat ïalehkai ka Sorkar Jylla u Bah Wailadmiki Shylla ha ka sngi Saitjaiñ u la plie paidbah ïa ka Badminton Mat jong ka Lion Mission and Youth Affairs (LS&YA) kaba la shna kyrpang hapoh ka Auditorium Hall jong ka ka Dorbar Shnong Lion Mission Compound.
Ïa kane ka Mat la mang lyngba ka skhim MLA ha ka jinglut kaba T.2.88 lak tyngka.
Haba kren ha katei ka jingïalang, u Bah Wailadmiki u la ong ba um shym la poi pyrkhat ba katei ka Mat ïalehkai Badminton kan long kaba rem dor. Kumta ula synñiang tang T. 2 lak lyngba ka skhim MLA jong u da ka jingkhmih lynti ba kan dap, hynrei kaba pynkmen eh ïa u ka long ka jingkylluid mynsiem jong ka Lion Sports and Youth Affairs ban pynlut na ladade bad ban thied da uba kham bha.
Haba kren halor ka kam ïalehkai, ula pynpaw ïa ka jingdonkam jong ki jingïalehkai bad ka jingkilanmet na ka bynta ban ïoh ïa ka koit khiah. Ka jingdon jong kane ka mat ïalehkai Badminton kan long ka jingkyrkhu ïa ki khun samla khamtam kin lait na kino kino ki jingmlien ba sniew hapoh ka imlang sahlang.
Ula ïaroh ruh ïa ka jinglah jong ka LS&YA ban pynlong ïa ki lympung ïalehkai bapher bapher ban kyntiew ïa ki sap jong ki samla bad khynnah ha ki jingïalehkai bapher bapher.
Shuh shuh u Myntri ula pynkynmaw ruh ba ka jingwan jong ka Meghalaya Games ha sor Jowai kaba long shibynta ka jingkyrkhu namar shibun ki skhim pynbha pynmiat naduh ki jingtei, ka jingmoramot, ka jingairong airup, ka jingbuh ïa ki bording da kaba pynbiang ha ïing skul, ki kolej bad ki Dorbar Hall jong ki shnong bapher bapher.
Haba ïadei bad ka jingkyrpad jong ka Dorbar shnong ban pynbiang Sound Proof hapoh Auditorium Hall, u Bah Wailadmiki Shylla ula kyntu ïa ka Dorbar shnong ban pynkhreh ïa ka jingmang pisa khnang ban tip ïa ka jinglut jingsep khamtam haba ula ïoh lad ban long kum u Myntri.
U la kren ruh halor ka madan Kiang Nangbah Stadium kaba ka jingpyntrei pynbha pynmiat mynta ka la ïaid shait shait kaba u la khmih lynti ba ka jingtrei yn pyndep hashwa ka National Games.
U Myntri ula pyntip ruh ba ka National Games ka lah ban long ha u Lber 2027, hynrei watla katta u la ong ba dangap ïa ka rai na u Myntri Rangbahduh ka Ri u Narendra Modi namar la khmih lynti ïa ka jingwan jong u ha ka sngi plie pyrda ïa ka National Games.
U la ïathuh ba 3 tylli ki jingïalehkai jong ka National Games lah ban pynlong ha Jowai kum ka phutbol kaba dei kawei napdeng kitei.
Nalor kata ula pyntip ruh ba kumba ka long mynta sa 80 tylli ki jaka sah kiba ka tnad ka dangshem jingeh ban pynbiang na ka bynta ka National Games. Hynrei ula ong ba ka sorkar ka la pyrshang ban pyndep ïa ka jingtei kum ïa ka Tourism Centre kaba ha Mukhla, bad la sdang ruh ïa ki skhim na ka bynta ki Home Stay lyngba ka tnad Tourism na ka bynta katei ka lympung.
