Jur ki jingpynkheiñ kyndon ha ki rukom ñiah kali ha Guwahati

Guwahati, Jylliew:

Ka Guwahati ka la ïoh ïa ka jingkiew kaba jur bha ha ka jingpynkheiñ ïa ki kyndon pynïaid kali ha u bnai Jymmang, ha kaba ka la kiew bha ha ki jingjia kiba ñiah kali da kaba buaid, kiba ñiah kali khlem helmet bad kiba ñiah kali bakla haba ïanujor bad u bnai Ïaïong.

Ïa kane la paw ha ki jingtip ba la pynmih da ki pulit pynïaid kali jong ka Guwahati ha ka sngi Thohdieng. Ka jinglong kaba kham sngewkhia ka long ha ki jingjia kiba ñiah kali hapoh ka jingdih kyiad.

Katba ki pulit jong ka sor ki la mudui 41 tylli ki mukotduma ba ñiah kali buaid ha u bnai Ïaïong, hynrei ka jingkheiñ ka la kiew bha sha ka 396 tylli ha u bnai Jymmang. Ki heh sorkar ki la ong ba ka jingñiah kali hadien ba la buaid ka dang bteng ban long ka daw bah kaba pynlong ïa ki jingjia aksiden ba shyrkhei ha surok bad ki jingïap briew.

U Deputy Commissioner of Police (Traffic) u Jayanta Sarathi Borah u la ong ba ka jingthmu ban pyntreikam ïa ki aiñ pynïaid kali kam dei tang ban lum kuna hynrei ban wanrah ïa ka jingsngewthuh ïa ki nongñiah kali bad ban pynthikna ïa ka jingshngaiñ ha surok.

U la pynpaw ia ka jingsngewkhia ba wat hapdeng ki jingpynsngewthuh paidbah man ka por, hynrei bun ki briew, kynthup ïa ki nongshong shnong kiba la nang la stad, ki dang ïai bteng ban pynkheiñ ïa ki kyndon ïaid kali.

Ki bor pynïaid kali ki la ïathuh ruh ba ki don kumba 12,000 tylli ki jingpynkheiñ kyndon halor ka helmet hapoh shibnai, kaba pynpaw ïa ka jingdonkam ban kham bud ryntih hapdeng ki nongñiah kali ar shaka.

La shim ïa ki sienjam kiba tyngeh pyrshah ïa ki nongleh kam sniew kiba ju pynkheiñ kyndon kynthup ïa ka jingkurup bad jingpyndam ïa ka license ñiah kali, khnang ban kyntiew ïa ka jinglong ba don jingkitkhlieh ha surok.

U DCP u la kyntu ïa ki nongñiah kali ar shaka bad kiba shong hadien u nongñiah ba ki dei ban phong da ki helmet haman la ka por bad kyrpad ïa ki nongñiah kali arshaka ba kin kiar ha ka ban dih buaid ha ka por ba ñiah kali, ka jingtam shakhmat kiwei pat ki kali haba ïaid ha surok bad ka jingpynïeng beaiñ harud lynti.

Ka jingkheiñ ka pyni ba ki jingshah ñiah kali bakla ki la kiew na ka 526 ha u bnai Ïaïong,  sha ka 963 ha u bnai Jymmang.

Ki jingmudui jong ka jingshong kali lai ngut ruh ki la kiew, ha kaba ki don 130 ngut ha u bnai Jymmang haba ïanujor bad 113 ngut ha u bnai, Ïaïong. Na kine, 96 tylli la lap lyngba ka Integrated Traffic Management System (ITMS), katba 34 tylli la ithuh da ka kti.

Ki jingpynkheiñ kiba ïadei bad ka jingpyndonkam mobile phone haba ñiah kali ki la kiew na ka 22 tylli ha u bnai, Ïaïong sha ka 31 tylli ha u bnai Jymmang.Ka jingdon jong ki license ñiah kali kiba la shah kurup ka la kiew bha sha ka 223 tylli ha u bnai Jymmang, na ka 20 tylli ha u bnai Ïaïong.

Ka jingpynkhlaiñ ïa ki lad pynjari aiñ ka la pynlong ruh ïa ka jinglum khajna kaba kham heh.

Ka khajna ba ïoh lyngba ki e-challan ka kiew na ka T.2.30 klur ha u Ïaïong  sha ka T.3.01 klur ha u bnai Jymmang.