Shillong, Jylliew 14
7 ngut ki heprit kiba hapdeng ka rta kaba 8 haduh 14 snem ki la mih na ka nongbah ha ka lah sngi U Blei ban leit shim bynta ha ka Sub Junior National Kickboxing Championship ka ban long ha Indore, Madhya Pradesh naduh 17 haduh 21 tarik mynta u bnai.
Kine ki heprit kiba kynthup ïa 4 ngut ki kynthei bad 3 ki shynrang ki dei kiba dangpule ha ka St. Francis De Sales Secondary School, Laitkor.
Kine ki kynthup ïa u Dajied Kyrpang Synjri (Kick Light and Low Kick below 48 kg), Zyarra Kharkongor (Light Contact below 38 kg), Bashanpaia Kharkongor (Kick Light below 40 kg), Heilina Sad (Light Contact below 42 kg), Abigail Ridamaka L. Pyngrope (Kick Light below 40 kg), Ribhadaker Bina (Light Contact below 48 kg) bad iwei iba dang 8 snem ka rta na Laitkor Mawrie i ban shim bynta ha ka Point Fighting below 28 kg.
Kat kum ka kyrwoh ba la pyllait da u Working President ka MSKA la ong ba ka jingïoh lad kine ki heprit ka la wan hadien ba ki la ïoh jingbit na ka Principal jong ka St. Francis De Sales SS kaba la shah sngewbha ïa ki ba kin leit shim bynta ha katei ka lympung.
Na ka liang katei ka synjuk ka la pynlong ïa ka jingïalang ha Hotel Assembly kaba don ha Khyndailad na ka bynta ban ai khublei kitbok ïa kitei ki heprit ba kin lah ban ïalehkai bha ha katei ka lympung. La ïadon lang ha kane ka sngi kynthup ïa u Bah Shaiborlang Lyngdoh Mawphlang, Co-Adviser ka MSKA bad kiwei kiwei.
