Guwahati, Jylliew:
Ka Assam State Election Commission ka la pynbna ïa ka por ban pynkhreh bad ban pynmih ïa ki thup kyrteng ki nongthep vote na ka bynta ka elekshon ban wan sha ka Silchar Municipal Corporation.
Ha ka jingpynbna, ka Commission ka la pynpaw ba ïa ka rukom pynkylla ïa ka thup nongthep vote yn sa pyntreikam katkum ki ward na ka bynta ki 42 tylli ki ward jong ka korporashon, ïa kaba la thaw da u Lat ka jylla Assam katkum ka Assam Municipal Corporation Act, 2022 lyngba ka jingpynbna Gazette ba la pynmih ha ka 28 tarik u Naiwieng, 2024.
Katkum ka por ba la buh, ka jingtrei shwa ban pynkhreh ïa ka thup kyrteng nongthep vote ka la sdang ha ka 12 tarik u Jylliew, 2026, bad kan bteng haduh ka 18 tarik u Jylliew. Ka jingpynkhreh ïa ka thup kyrteng nongthep vote, kaba pynshong nongrim ha ka tarik ba lah ban ïoh ïa ka kyrteng jong ki nongthep vote ha ka 1 tarik u Kyllalyngkot, 2026, kan long naduh ka 19 tarik, Jylliew haduh ka 28 tarik, Jylliew.
Ia ka draft electoral roll yn sa pynmih ha ka 29 tarik u Jylliew, hadien kata ki nongthep vote kin lah ban aiti ïa ki jingdawa bad jingpyrshah haduh ka 6 tarik u Naitung.
Ka jingpynbeit ïa ki jingdawa bad ki jingpyrshah yn pyndep ha ka 13 tarik u Naitung, katba ïa ki thup kyrteng ki nongthep vote ba khatduh la buh ban pynmih ha ka 15 tarik u Naitung.
Ka commission ka la ong ba ïa ka jingpynkhreh bad jingpynmih ïa ki thup kyrteng nongjied yn ïaid katkum ki kyndon 5, 6, 7, 8, 9 bad 10 jong ka Assam Municipal Corporation Election Rules, 2022.
Ka rukom treikam kan long katkum ki thup nongthep vote jong ka Ïingdorbar Thawaiñ kiba dang treikam mynta, bad ka tarik ban ïoh ban jied kan long kumba long ha ka 1 tarik u Kyllalyngkot, 2026.
Ka Assam State Election Commission ruh ka la pyntip ba la thung ïa ki ophisar Registration na ka bynta ki ward bapher bapher jong ka Silchar Municipal Corporation.
