Shillong, Jylliew 15
Ka Jylla ka la ïoh sa kawei pat ka synjuk ïalehkai ba la tip kum ka Meghalaya Triathlon Association (MTA) hadien ba la seng ïa ka jingïalang kaba la long ha Rotary Club, Shillong ha kaba ïa ka kam President la shimti da kawei na ki nongmareh ba paw ka Jylla, ka Kong Rephica Pde.
Kat kum ka kyrwoh la ong ba ki nongïalehkai bad ki coach na ki jait jingïalehkai bapher-bapher ki la wan lang da ka jingthmu kaba ïasam lang ha ka ban tei ïa ka jingïalehkai Triathlon kaba khlaiñ bad kaba paw ha ka Jylla ha ka lawei ka ban wan na ka bynta ba kan long kaba paw ha kylleng jong ka ri.
Ha katei ka jingïalang ka la sakhi ïa ka jingjied na ka bynta ki dkhot ka Executive Committee jong kane ka synjuk kaba dangthaw thymmai.
Ïa ka kam Vice President la pyn-khamti ha u L.S. Singha, General Secretary sha ka Kong Shivani Pde, Joint Secretary Bah Badon Singh Tham, Joint Secretary Bah Shai-kupar Kharshiing, Treasurer Bah A. Lyngdoh. Ki Executive Member ki kynthup ïa ka Kong Larisa Marpan, Bah Simon Khyriem. Advisor Bah James Perry bad Bah John F. Kharshiing, Working President ka MSOA.
Ha katei ka jingïalang la ïakren ruh ïa ki mat kiba ïadei bad ka 39th National Games 2027 ka ban long ha ka Jylla.
Na ka liang ka President katei ka synjuk, ka Kong Rephica Pde, kaba long kawei na ki nongmareh (ultra-marathon runner) kaba paw ka Jylla ka la ong, “Kane ka long u mawjam ba nyngkong eh ba ngi la lah ban seng ïa kane ka jingïalehkai. Ka jingïalehkai triathlon ka dei kaba kynthup lang ïa ki lai tylli ki jingïalehkai kata ka jingïakop jngi, ñiah saikil bad ka jingïamareh.”
Ka Kong Rephica ka la ïashim bynta bad jop ruh ha ki katto katne ki ultra marathon bad long distance ha kylleng ka ri India. Ki jingïakop ba kham paw napdeng jong kine ki kynthup ïa ka Khardungla Challenge (72km) ha u snem 2018 bad 2019, kaba la pynlong ïa ka kum ka kynthei ba nyngkong eh ban wan shakhmat.
“Ka jingthaw ïa kane ka synjuk kan dawa kumjuh ban long kiba ïai shah ha ryngkat ka jingtrei shitom lyngba ka jingïaid lynti kaba jngai ban nangkiew shaphrang,” ka la bynrap.
Da kaba buh ïa ki mat ba kongsan, ka la pynrung ïa ka jingithuh bad kyntiew ïa ki samla kiba don sap ha kylleng ki distrik, ban ai jinghikai kiba biang na ka bynta ka jingjngi, ka jingñiah saikil, bad ka jingmareh, ha ryngkat ka jingdon ki nonghikai kum ki coach bad ka jingkyrshan ba pura, bad ban thaw ïa ka almanac jong ki jingïakop ban ai ïa ki nongïalehkai ïa ka jingshemphang kaba shisha ha ka jingïakop mareh.
Ka Kong Pde ka la pyntip ba shen yn sa pynlong ïa ka jingpyrshang ne trials ban jied ïa ki nongïalehkai na ka bynta ka National Games ka ban long ha u snem ban wan wan. “Kane ka synjuk ka dei ka jong ngi baroh. To ngin ïatreilang lang ha ryngkat ka jingdon akor, ban buh ïa ka Meghalaya ha ka map jong ka India ha ka jingïalehkai triathlon,” ka la bynrap.
