Guwahati, Jylliew:
Kum shi bynta ban pynjur ïa ki jingïakhun pyrshah ïa u drok, ki pulit jong ka Dibrugarh ki la pynlong ïa ka jingkhynra kaba jur bha ha Harijan Colony kaba don hajan ka Dibrugarh Town Railway Station, kaba la pynlong ïa ka jingkem ïa ki khyndai ngut ki briew bad ka jingkurup ïa ki tiar ba la suba ba ki dei ki drok heroin, ka pisa bad ki jingdeng ksiar.
Haba ïakren bad ki lad pathai khubor ka Nayan Moni Baruah ka la ong ba kane ka jingkhynra ka long shi bynta ban ïaleh pyrshah ïa ka jingkhaïi drok ha ka distrik hapoh ka jingpeit jong u heh pulit jong ka.
Katkum ka jingong u Baruah, ki kynhun pulit ki la pynlong ïa ka jingkhynra ha ki jaka bapher bapher ha kylleng ka distrik ha kine ki taïew ba la dep.
Ki jingtip ba la lum ha kito ki jingtrei ki pyni ba ka tynrai jong utei u drok ka dei ka thaiñ Railway Colony, kaba la tip ha katei ka jaka kum ka “Koyla Patti.”
Khlem da pynslem hadien ba la ïoh jingtip halor kane ka jingdon jong ki nongkhaïi drok, ki pulit ki la pynlong ïa ka jingkhynra kaba kyndit ha katei ka thaiñ ha ka sngi Saitjaiñ. Ha kane ka jingkhynra la ïoh ban kem haduh 9 ngut ki briew bad la talasi ïa ki katto katne ki ïing.
Ki pulit ki la ïoh kurup kumba 79 gram u drok heroin, T.4.92 lak bad shibun ki jingdeng ksiar na ka ïing sah jong kawei ka longkmie kaba la tip kyrteng kum ka Sujata Biswas.
Ki heh sorkar ki la ïathuh ba ka jingtohkit ka dang ïaid shakhmat ban lap ïa ka tynrai bad ka kynhun jong ka jingkhaïi drok kaba treikam ha katei ka thaiñ.
Na ka liang jong ki pulit ki dang pyntikna ruh la ki don ne em napdeng kitei kiba shah kynnoh ba dei ki nongtrei jong ka Indian Railways.
U Baruah u la pynpaw ba lada lap ba uno uno u briew uba donkti u dei na ka tnat Railway, ki pulit kin sa ïakren thikna bad ki bor ba dei khmih bad kin pan ïa ka jingpynshitom kaba tyngeh na ka tnad pyrshah ïa ki.
