Shillong, Jylliew 16
U khlur ïalehkai kinglieng ka Jylla uba la wanrah nam da kaba khur ïa ka takma rnong ha ka 38th National Games 2025 kaba la long ha Uttara-khand, u Pynshngaiñ Kurbah u la shah pynkup burom da ka shithi thung kam ha ka Sorkar Jylla.
Ïa kane la pynkhamti ha ka sngi Ba-ar da u Myntri Rangbah ka Jylla u Conrad K. Sangma kum u kongsan ha ka Megha-laya Sports Conclave 2026 kaba la long ha kane ka nongbah ha ryngkat ka jingïadon lang u Myntri ka tnat ïalehkai u Bah Wailadmiki Shylla kum u symbud kongsan ryngkat ki heh ophisar ba kynthup naduh u Chief Secretary ka Jylla u Dr. Shakil P. Ahammed bad kiwei kiwei.
Lah ban pynkynmaw, u Pynshngaiñ uba na ka shnong Umtham, Ri Bhoi District u la lah ban wanrah nam bad burom ïa ka Jylla da kaba khur ïa katei ka takma ha ka sien kaba nyngkong eh ha ka jingïakop kinglieng jong ka Men’s Slalom K1 kaba la long ha Uttarakhand.
Te kumta mynta une u khlur ïalehkai u la shah thung ban shimti shipor kum u Assistant Coach (OSP) Group-C (Non-Gazetted) Grade III hapoh ka Meghalaya Outstanding Sportsperson Direct Appointment Policy jong ka Sorkar Jylla.
Kane ka long ka sien kaba nyngkong eh ba ka Sorkar Jylla kan pynkup burom da ka kam Sorkar ïa ki nongïalehkai namar ka dei ka jingkular jong ka naduh u snem 2018 ba kino kino kiba lah ban khur takma ha ka National Games, Asian Games, Commonwealth Games bad Oympic kin shah pynkup burom da ka kam Sorkar khnang ba kan long ka jingkyrshan ïa ki ba kin nanglah ban jam shaphrang ha ki kam ïalehkai jong ki.
Te kumta u Pynshngaiñ u dangdon mynta ha ka jingpynkhreh ban ïashim bynta sa ha ka National Games 2027 ka ban long ha ka Jylla.
