Imphal, Jylliew:
Ki bor pahara bad ki pulit ka Manipur ki la pynlong ïa ki jingkhynra kiba bun ha kylleng ka Manipur ha ka 14 bad 15 tarik u Jylliew, kaba la ïarap ïa ki ban ïohkem ïa saw ngut ki dkhot ba la shah pynshisha ba ki la ïatreilang bad ki kynhun lehnoh bapher bapher bad la ïoh ruh ban kurup ïa ki tiar ïaleh bad kiwei pat ki tiar pyndonkam, la ïathuh ki heh pulit.
Ha ka 15 tarik u Jylliew, ki bor pahara ki la kem ïa u briew uba la kynnoh ba u dei u dkhot uba bat ïa ka kyrdan kum u Self-Style Private jong ka RPF/PLA. Une u briew u dei uba la tip kyrteng kum u Thoudam Roshan Meitei uba la tip ruh da ka kyrteng kum u Pibarel (21), uba shong basah ha Sawombung Maniyaiskul kaba hap hapoh jong ka Lamlai Police Station ha Imphal East district. La kem ïa u na ka ïing sah jong u ha ka por ba la pynlong ïa ka jingleit khynra.
Ha ka jingkhynra ba kyrpang kaba la pynlong ha ka 14 tarik, Jylliew, ki pulit ka Manipur ki la kem ïa uwei u briew uba la shah kynnoh ba u dei u nongdawa pisa bad u dei u dkhot ba trei shitom jong ka RPF/PLA na ka Naka Check Point kaba don ha Ngaikhong Khunou ha Bishnupur District. Une u briew uba la shah kem u dei uba la tip kyrteng kum u Moirangthem Naresh Singh ba la tip ruh da ka kyrteng kum u Thoungamba bad kum u Chingsang (30), uba dei shnong trai na Tuibong Farm Mamang ha Churachandpur distrik bad mynta u sah ha Project Mayai Leikai ha Bishnupur distrik.
Ki pulit ki la ïoh kurup ruh ïa kawei ka thuk thuk Bajaj Pulsar kaba don ïa u number MN01AB-2102 na kti jong u.
Ha kane ka juh ka sngi ki bor pahara ki la ïoh ban kem ïa u wei uba la shah kynnoh ba u dei u dkhot ba trei shitom jong ka UNLF (P), uba la tip kyrteng kum u Khumukcham Shyamsunder Singh (54) uba shong basah ha Chinga Mathak Nameirakpam Leikai kaba hap hapoh jong ka Singjamei Police Station ha Imphal West district. La kem ïa u na ka jaka sah jong u.
Ha kane ka jingkhynra, ki bor pahara ki la ïoh kurup ïa kawei ka suloi 9mm ryngkat bad u kuli na ka jingkhmih bniah.
Ha kawei pat ka jingkhynra, ki bor pahara ki la ïoh ban kem ïa uwei uba la kynnoh ba u dei u dkhot ba trei shitom jong ka NRFM na kawei ka lad kaba don ha Yaripok Lamlai kaba hap hapoh jong ka Andro Police Station ha Imphal East district. Une u briew uba la shah kem u dei uba la tip kyrteng kum u Ningthoujam Premkumar Singh ba la tip ruh da ka kyrteng sin kum u Punsirol bad kum u Ibungo (35) uba shong ba sah ha Keibul Mayai Leikai kaba hap hapoh jong ka Keibul Lamjao Police Station ha Bishnupur District.
Ki bor pynïaid kim shym la pynpaw shuh ïa ki jingtip ba bniah ha kaba ïadei bad ka jingkynnoh donkti jong kine kiba la shahkem. La ïathuh ba ka jingtohkit bad ka jingpyntreikam katkum ka aiñ ka dang ïaid shakhmat.
