Guwahati, Jylliew:
U Myntri Rangbah ka Assam u Himanta Biswa Sarma ha ka 14 tarik, Jylliew u la pynpaw ïa ka jingjop kaba khraw ha kaba ïadei bad ka jinglah ban pynïoh ïa ka koit ka khiah na ka bynta ïa baroh, da kaba pynpaw ba ka jylla kam shym la ïoh jingkheiñ ban don kiba ïap na ka jingpang Dengue hapoh u snem 2024-25.
Haba ïasam ïa kane ka jingjop ha ka rynsan X, u Myntri Rangbah ka Jylla ula batai ïa kane kum ka mawjam kaba kongsan ha ka jingpyrshang jong ka Assam ban ïakhun pyrshah ïa ki jingpang ba la pynsaphriang da ki khñiang jingpang bad ban pynkhlaiñ ïa ki rukom sumar paidbah.
Ka jingpynbna ka pynpaw ïa ka jingjop jong ki lad jingïatreilang ba la shim da ka sorkar jylla, kynthup ïa ka jingpeitngor kaba jur, ki jingpynkhreh ban tehlakam ïa ki khñiang jingpang, ki jingpynsngewthuh paidbah, ka jinglap kloi, bad ka jingïarap ha ka por kaba biang.
Ka jingjop ka pyni ïa ka jingpyrkhat ba bteng jong ka Assam ban ïada na ka jingsaphriang jong ka jingpang Dengue bad ban pynduna ïa ka jingïap kaba ïadei bad kane ka jingpang.
Ki bor pynïaid ka koit ka khiah ki la bteng ban pynksan ïa ka jingïashim bynta jong ki paidbah, ki lad pynkhuid, bad ka jingsumar pang ban ïada na ka bynta ban tehlakam ïa ki jingpang ba la pynsaphriang da ki khñiang jingpang.
Da kaba khot ïa ka jingkheiñ ba ka long “ZERO,” u Myntri Rangbah u la pynpaw ïa kane ba ka long kum ka jingjop kaba pawnam ha ka jingtehlakam ïa ki jingpang ba la pynsaphriang da ki khñiang bad ka jingpynshisha ïa ka jingpyrshang lang jong ki nongtrei ka tnat ka koit ka khiah, ki bor shnong, bad ki paidbah ha kaba ïada ïa ka koit ka khiah jong ki paidbah ha kylleng ka jylla.
