Shillong, Jylliew 17
Ka Argentina ka la sdang da ka jingjop ha ka FIFA World Cup hadien ba ka la pynliem noh ïa ka Algeria da 3-0 kol bad u Lionel Messi u la khur ïa ka hat-trick, ha ka step jong ka sngi Balang ha Kansas City.
Ha kane ka jingïakhun u Messi u la thep ha ka minit kaba 17, 60 bad 76, kaba long ka hat-trick kaba nyngkong eh ha kane ka lympung ïalehkai World Cup, ha ki 200 sien ïakhun kiba u la ïalehkai na ka bynta ka Argentina u la long uba nyngkong eh ban ïoh ïalehkai ha ki hynriew tylli ki World Cup.
Kine ki kol ki la pynlong ïa u ban kynjoh sha ki 16 kol ha ka World Cup, kaba ïaryngkat bad u Miroslav Klose na ka bynta ka rekod jong ki kol baroh. U la lah ruh ban noh synñiang haduh 24 kol ha ka World Cup bad mynta u la tam ïa u Pele (21) na ka bynta ka rekod jong ki baroh.
Kine ki kol kiba u la ïoh thep ki la long kiba kynsai bha, ha kaba ka kol ba nyngkong ka dei kaba u la ïoh ban shut najngai, ka kol kaba ar kaba u la ïoh kham hajan bad kaba lai ka dei kaba u la rung na kyndong.
Ha kawei pat ka liang u Messi u la jaw ummat hadien ba u la thep ïa ka kol kaba nyngkong ha kane ka jingïakhun kaba nyngkong jong ka Group-J.
Na ka liang ki nongkyrshan ki la dap da ka jingsngewkmen ban ïohi ïa une u kapten jong ka Argentina u la long kum u rangïalehkai ba kynsai bad ki la shad kmen hadien ba u la thep ïa ka kol kaba nyngkong kaba la pynkyndit ïa kiba bun.
Haba kren hadien ba la kut ka jingïalehkai, u Messi u la shah kylli ba na kaei ka daw kaba pynlong ïa u ban jaw ummat. Utei u rangïalehkai ba la 38 snem ka rta u la pynpaw ba u la mad ïa ka por kaba eh kaba la pynlong ïa u ban ïoh ïa ka jingïalehkai kaba nyngkong jong ka Argentina, da kaba batai ba u la jaw ummat da ka mynsiem kaba kmen.
