Shillong, Jylliew 17
Watla u Kylian Mbappe u la shah kyntait ïa ka penalty ha u rephri, hynrei ka France ka la lah ban khur ïa ka jingjop kaba nyngkong ha ka World Cup ha kaba ka la pynliem noh ïa ka Senegal da 3-1 kol ha ka step jong ka sngi Palei.
Utei u rangïalehkai shakhmat ka Real Madrid u la shah pynur hapoh ‘box’ ha u kapten ka Senegal u Sadio Mane ha ka minit kaba 58, hynrei na ka liang u rephri na Iran uba la kha ha Australia u Alireza Faghani u la bteng beit shaphrang ïa kane ka jingïalehkai, katba kat kum ka replay ka pyni ïa katei ka jingshisha kaba la jia ïa u Mbappe.
Kumba ka paw u Mbappe u la kylla long u rangthep kol ba kynsai ka France ha kaba u la lah ban thep 14 kol na ki 15 sien ïakhun.
Haba phai sha kane ka jingïakhun ka la long kaba itynnad bad kaba ïakhaid bha ha ka rukom ïalehkai, hynrei haduh kaba kut jong ka kylla step kim shym la lah ban thep kol.
Dei ha ka kylla miet ba u Mbappe u la pynkhih jar nyngkong eh ha ka minit kaba 66.Kane ka kynhun ka la pynbud biang ïa ka kol kaba ar lyngba u Bradley Barcola (82). Hashwa ban wai ka Senegal ka la lah ban pynphai kylla shi kol lyngba u Ibrahim Mbaye (90+5) hashwa ba u Mbappe (90+6) un thep ïa ka kol kaba ar jong u ban pynlong ïa ka France ba kan khur ïa ka jingjop.
Ka France kan pynkhreh ïa ka jingïakhun kaba ar pyrshah ïa ka Iraq ha ka 23 tarik mynta u bnai.
Ha kawei pat ka jingïakhun kaba la long ha Boston Stadium, u Erling Haaland u la thep ar kol na ka bynta ban pynlong ïa ka Norway ban khur ïa ka jingjop kaba nyngkong hadien ba ka la pynliem noh ïa ka Iraq da 4-1 kol.
Une u rangïalehkai ba dang 25 snem ka rta u la lah ban kynjoh sha ki 57 kol ha ki 51 sien ki jingïakhun kiba u la ïoh ban mihkhmat ïa ka ri jong u kaba la pynlong ïa ka ban wanphai biang sha ka World Cup hadien 28 snem. Ha ka jingshisha une u rangïalehkai ka Manchester City u la dei ban khur ïa ka hat-trick kaba 55, hynrei u la shah khanglad noh ha u rangapkol ka Iraq u Jalal Hassan.
Hashwa ban kut ka jingïalehkai jong ka kylla step, u Haaland u la thep ar kol ha ka minit kaba 29′ & 43′ hashwa ba u Aymen Hussein (39′) un pynphai shi kol na ka bynta ka Iraq.
Hynrei ha ka kylla miet ka ka ïoh ban thep da ar kol lyngba u Leo Ostigard (76′) bad ïa kawei pat la iarap pynthep da u Aymen Hussein (90’+6).
