Shillong, Jylliew 17
Ki nongkyrshan jong u khlur ïalehkai ba paw ka pyrthei u Lionel Messi, kaba la tip kum ka Argentina & Messi Fan Club Meghalaya, ha ka sngi Balang ka la leit ban pynkup burom ïa ka Sanfida Nongrum.
Ka Sanfida ka dei ka khlur ïalehkai phutbol jong ka ri India ha kaba ka la rah ïa ka burom jong ka Meghalaya, na ka bynta ban pynlong ïa ka India ban rah ïa ka nam lahduh ha ka SAFF Women’s Championship hadien ba ka la pynliem noh ïa ka Bangladesh da 3-1 kol ha ka jingïakhun final dangshen kaba la long ha Goa.
Te kumta ka Sanfida ka la ïohpdiang ïa ka nam Most Valuable Player hadien ba ka la ïoh ban thep shi kol ha ka final bad kumjuh shi kol ha ka semi final.
Ïa katei ka jingpynkup burom la pynlong ha ka ïingsah jong ka Sanfida ha Langkyrding Lane-8, Shillong.
Ka Samla Sanfida Nongrum, ka ba dang ha ka rta ba 21 snem, ka la shah jied ban mih khmat ïa ka India ha ka por ba ka ïalehkai na ka Garhwal United FC, bad ka dei ha une u snem hi ba ka la sdang mihkhmat ïa ka Ri India.
Kane ka kyrteng jong ka Sanfida ka la paw ha kylleng ka ri India, namar ka jinglah jong ka ban thep ïa ka goal ha ki jingïalehkai kiba kongsan.
Na ka liang ka kmie jong ka Sanfida Nongrum ka la pdiang sngewbha ïa ki nongïalam ka Argentina Messi Fan Club Meghalaya bad ka la pynpaw ïa ka jingsngewkmen. Kumjuh ruh na ka liang ka Sanfida ka la ai khublei ïa ka kynhun kaba la kloi ban leh ïa kane ka kam ban pynkup burom ïa ka.
Na ka liang u President ka Argentina Messi Fan Club Meghalaya u la ong ba kane ka dei ka jingleh sngewbha kaba rit eh bad ka long ruh shi bynta ban ai mynsiem ïa kane ka samla ba kan dangtrei shitom ha ka kam ïalehkai jong ka.
Ha kawei pat ka liang u Wanjied, Secretary ka kynhun u la ai mynsiem sha baroh ki samla ki ban dangheh dangsan ba kin ïalehkai pynpoi sha ka thong la ha kino kino ki sap ba ki don, khnang ba kin lah ban wanrah nam bad burom ïa ka Jylla bad ïa ka ïing ka sem jong ki.
