Guwahati, Jylliew:
Ki pulit jong ka Geleki ha Sivasagar distrik jong ka Assam ki la kem ïa lai ngut ki briew na Rajasthan halor ka jingkynnoh ba ki thmu ban ïalam ïa kawei ka khynnah kynthei kaba dang rit ka rta na ka shnong Kolgaon Bogi Chapori sha Rajasthan.
Kine kiba la shah kynnoh ki dei kiba la tip kyrteng kum u Mohan Ram, u Rajesh Bhati bad u Sukhram.
Ki pulit ki la ïathuh ba kitei ki lai ngut ki la sah ha kawei ka ïing ha katei ka shnong ha kine ki lai sngi ba la leit.
Katkum ka jingïathuh jong ki heh sorkar, ki pulit ki la bat ïa kitei ki lai ngut katba ki dang pynbeit ban rah noh ïa kawei ka khynnah kynthei kaba dang 15 snem ka rta na Bogi Chapori shabar ka Jylla. Hadien kata la pyllait im ïa kane ka khynnah.
Ki pulit ki la kem ruh ïa ki kpa ïeid jong kane ka khynnah, u Suleman Laik, ha kaba ïadei bad kane ka jingjia.
Baroh saw ngut kine ki briew ki dang shah kylli jingkylli kum shi bynta jong ka jingtohkit.
Ki pulit ki la ïathuh ba ki jingpyntreikam ki dang ïaid shakhmat ban pynthikna ïa kiei kiei baroh kiba la pynlong ïa kane ka jingjia bad hato kiwei pat ki lah ban donktilang ne em nalor kine kiba la shah kylli jingkylli.
Ka jingtohkit kaba kham bniah ka dang ïaid shakhmat haduh ba la thoh ïa ka khubor.
