Aizawl, Jylliew:
U Lat jong ka jylla Mizoram u VK Singh ha ka lah sngi U Blei, u la khot lawer ïa ka jingïatreilang pyrshah ïa ka jingpyndonkam bakla ha ka jingdih drok bad jingdih pynbuaid, da kaba kyntu ïa ki briew ban pynneh ïa ka dor jong ki Mizo jong ka Tlawmngaihna, ka mynsiem jong ka jinglen lade, ka jingsngewrit bad ka jingshakri mon sngewbha.
Ha ka khubor ba u la ai ha ka sngi ba la don ka 91st Raising Day jong ka Young Mizo Association (YMA), u Singh u la ïaroh ïa ka jingnoh synñiang jong kane ka seng kaba la slem bha ha ka jingshakri ïa ka imlang sahlang bad ka bha ka miat jong ki paidbah ha kylleng ka Jylla.
U la ai khublei ïa ka YMA kaba la ïarap ïa kiba donkam jingïarap, ban pynneh pynsah ïa ka kolshor bad ka pateng jong ki Mizo, bad ban kyrshan ïa ka sorkar ban pyntreikam ïa ki prokram bapher bapher kiba ïarap ïa ki paidbah.
U Lat u la kyntu ruh ïa ki briew ban kyntiew ïa ka jingïatylli hapdeng ki bynta bapher bapher jong ka imlang sahlang, ban burom ïa ki rangbah bad ban ïai ïadei bad ki tynrai jong ka kolshor jong ki.
Haba pynpaw ïa ka jingsngewkhia halor ka jingma kaba nang jur jong ka jingdih drok bad ki jingdih buaid, u Singh u la ban jur ïa ka jingdonkam ban ïatreilang da ki shnong ki thaw bad ki jaka treikam ban ïada ïa ki samla bad ban pynthikna ïa ka lawei kaba kham shngaiñ.
Ka seng bhalang kaba donbor ka la rakhe ïa ka sngi kyntiew jong ka da ki jinglehniam, ki jingïakop ïalehkai bad ki prokram kolshor ha kylleng ka Mizoram.
Ki tnad jong ka YMA ki la pynlong ruh ïa ki jingpynkhuid ha ki jaka bad ki shnong bad ki la kner ïa ki kti jong ki ban ai jingïarap sha ki jaka ri khunswet, ki jaka pynbha pat ïa ka jingim jong kiba la ngop ha ki jingdih basniew bad ki jaka ba don kiba kham duna ka jingïoh.
U President ka Central YMA u R. Lalngheta u la khot la wer ïa ki dkhot ba kin nang pynkhlaiñ shuh shuh ïa ka jingtrei shitom jong ki ha ka kynhun ban ai ka jingshakri bad ban ïaleh katba lah ban ïakhun pyrshah ïa ki kam khaïi drok.
U la batai ïa ki nongkhaïi drok kum ki nongshun jong ki longïing longsem, ki shnong ki thaw bad ka jylla.
