Aizawl, Jylliew:
Na kiba bun ki jingïoh kurup ïa ki jngdih pynbuaid na kylleng ki jaka, kumba ka paw mynta kaba heh tam ka dei na ka thaiñ Khatla jong ka Aizawl ha ka miet jong ka sngi Ba-ar, ha kaba ka Excise and Narcotics Department, ha ryngkat ka jingïatreilang ki shipai ka tnat Assam Rifles, ki la ïoh kurup ïa shibun ki drok bad kem ruh ïa 6 ngut ki briew, kynthup ïa u nong Myanmar, la ïathuh ki heh pulit ha ka sngi Balang.
Ki heh ba dei khmih, ki la ïoh ban kurup 350 gram u drok heroin ba la thep ha ki 30 tylli ki sop sabon. Ki la don lai ngut ki briew kiba la shah kem ha kaba ïadei bad ka jingïoh kurup.
Kine kiba la shahkem ki dei kiba la tip kyrteng kum u Vanlallianzauva (33), u nong Myanmar uba shong basah ha Zokhawthar kaba don ha Champhai distrik, u K.C. Lalrintluanga (38) jong ka Ramhlun South ha Aizawl and u Lalhmangaihzuali (30) na Bawngkawn ha Aizawl.
Kham hashwa ha kane ka juh ka sngi, ka la don sa kawei pat ka jingkhynra hajan madan Temple ha Tuikual South, Aizawl, ha kaba la ïoh ban kurup ïa u drok uba bun da 241 gram na u Gin Khan Sang (28), uba shong ba sah ha Churachandpur distrik ha Manipur, ki pulit ki la kem ïa u na ka bynta ka jingtohkit khnang ban lap dien shuh shuh sa ïa kiwei pat ki runar kiba la ïadonktilang ha kum kine ki kam sniew.
Ha ka jingïatreilang kaba kyrpang, ka tnad Excise and Narcotics bad ka Field Intelligence Unit (FIU) jong ka Assam Rifles ki la bat ïa ka jingkit kaba la don 9,786 tylli ki dawai Methamphetamine kiba khia kumba 950 grams ha ka shnong Tlangsam kaba don ha Champhai distrik, kaba don marjan bad ka khappud Myanmar.
Ki heh jong kine ki kynhun, ki la kurup ruh ïa ka kali Tata Intra V17 ba la pynshisha ba ka la kit ïa kine ki jingdih pynbuaid. Arngut na kiba la shahkem ha kane ka por, ki dei kiba la tip kyrteng kum u Lalramnghaka (30) bad Zosangzuala (38), kine baroh arngut ki dei ki nongshong shnong jong ka Zion Veng kaba don ha Champhai.
